Ökumenn hafi varann á

Búast má við mjög snörpum vindhviðum sunnan Vatnajökuls, undir Eyjafjöllum og Mýrdalsjökli í dag. Gular viðvaranir Veðurstofunnar eru nú í gildi fyrir Austfirði og Suðausturland.

Á Austfjörðum er gert ráð fyrir norðan og norðvestan 15 til 23 m/s og að hviður geti farið í 25 til 40 m/s. Þá mun ganga á með éljum og einnig eru líkur á skafrenningi.

Það verður ívið hvassara á Suðausturhorninu í dag, norðan 18 til 25 m/s í vindstrengjum við Vatnajökul og geta hviður náð 30 til 45 m/s. Veðurstofan varar jafnframt við snjóþekju á vegum og hugsanlegum skafrenningi og hálku.

Á Austfjörðum sem og á Suðausturhorninu eru því varasamar aðstæður til aksturs. Annars er úrkomulaust að kalla annars staðar á landinu og mun lægja og birta til á Suður- og Vesturlandi í dag. Kólnandi veður.

Veðurhorfur á landinu næstu daga

Á föstudag:

Norðvestan 10-18 m/s A-lands framan af degi, hvassast og dálítil él með ströndinni, en lægir síðan smám saman. Annars hæg breytileg átt og léttskýjað. Frost 4 til 15 stig, mest í innsveitum. 

Á laugardag:

Hæg breytileg átt, bjartviðri og talsvert frost. Suðaustan 10-15 m/s við SV-ströndina síðdegis og dregur úr frosti þar. 

Á sunnudag:

Austan- og norðaustankaldi og víða léttskýjað, en dálítil él við N- og A-ströndina. Áfram kalt í veðri. 

Á mánudag:

Norðankaldi og léttskýjað sunnan heiða, en dálítil él NA-til. Dregur úr frost í bili. 

Á þriðjudag og miðvikudag:

Yfirleitt fremur hægir austlægir vindar og úrkomulítið, en dálítil él við sjávarsíðuna. Frost um allt land.