Þrjú suðaustan illviðri í vændum

Þrjú suðaustan illviðri eru í vændum fram yfir helgi samfara djúpum lægðum og leysingum. Veðurfræðingurinn Einar Sveinbjörnsson greinir skilmerkilega frá þessu Á Facebook-síðu sinni þar sem hann deilir spákortum af Íslandi frá Evrópsku reiknimiðstöðinni.

Fyrsta kortið sem hann deilir sýnir veðrið í morgun en hin kortin sýna til dæmis feikna suðaustan storm suðvestanlands seinni partinn á fimmtudag, suðaustan illviðri um austanvert landið seinni partinn á föstudag og suðaustan illviðri seint um næstkomandi laugardagskvöld.

„Spárnar geta tekið miklum breytingum sérstaklega er tímasetning verstu illviðranna óviss. Meiri vissa er hins vegar fyrir því að lægðirnar verða djúpar og að þær fara hér hjá með einhverjum hætti,“ skrifar Einar.

Veðurhorfur á landinu næstu daga samkvæmt spá Veðurstofu Íslands:

Á morgun: 

Hæg suðlæg átt og dálitlar skúrir eða él á morgun, en sums staðar rigning eða slydda eystra fram á kvöld. Hiti víða 0 til 5 stig að deginum.

Á fimmtudag:

Vaxandi suðaustanátt, 15-23 m/s undir kvöld með talsverðri rigningu um landið sunnanvert, en lengst af þurrt á Norðurlandi. Hlýnar í veðri.

Á föstudag:

Suðaustan hvassviðri eða stormur og talsverð eða mikil ringing, einkum um landið suðaustanvert. Hiti 2 til 7 stig.

Á laugardag:

Vaxandi sunnan- og síðan suðaustnátt með skúra- eða éljahryðjum. Suðaustan stormur um kvöldið með talsverðri rigningu um landið sunnanvert, en úrkomulítið norðantil. Hiti 0 til 5 stig.

Á sunnudag:

Líklega suðaustlæg átt með éljum, en áfram hvasst og rigning fram eftir degi austanlands.

Á mánudag:

Sennilega suðaustlæg eða breytileg átt með skúrum eða éljum víða um land.