Cole framlengdi við LA Galaxy

Hinn 37 ára gamli Ashley Cole er ekki dauður úr öllum æðum og ætlar sér að spila áfram með LA Galaxy í Bandaríkjunum.

Cole er búinn að skrifa undir nýjan eins árs samning við félagið en hann gekk í raðir þess í janúar árið 2016. Hann hefur leikið 55 leiki fyrir félagið.

Bakvörðurinn hefur átt afar gifturíkan feril og spilaði 107 landsleiki fyrir England á sínum tíma. Hann lagði landsliðsskóna á hilluna þar sem hann var ekki valinn í landsliðið fyrir HM 2014.

„Cole hefur verið frábær leiðtogi hjá okkar félagi og það eru afar góð tíðindi að við munum njóta krafta hans áfram,“ sagði Sigi Schmid, þjálfari Galaxy.

Næsta tímabil í MLS-deildinni hefst þann 4. mars.