Hægðist mjög á fjölgun ferðamanna

Heildarkortavelta Íslendinga jókst áfram í desember síðastliðnum og nemur aukningin 7 prósent á milli ára á föstu gengi og verðlagi. Það hægir því aðeins á vextinum í desember, en á fjórða ársfjórðungi nam hækkunin 10,1 prósenti og er það nokkuð umfram einkaneyslu. Upplýsingarnar birtir Greiningardeild Arion banka.

Þá segir að ferðamenn hafi valdið vonbrigðum, bæði hafi færri komið en gert var ráð fyrir og var kortavelta þeirra minni en áður hefur tíðkast. Það má því búast við slökum viðskiptajöfnuði á fjórða ársfjórðungi og útilokar greiningardeildin ekki að viðskiptahalli verði raunin. Það væri þá í fyrsta skipti á ársfjórðungi frá árinu 2014.

Ferðamannaþjónustan komin á táningsaldurinn

Tölur frá Ferðamálastofunni um brottfarir erlendra farþega um Keflavíkurflugvöll í desember gefa til kynna að fjölgunin hafi verið 8,4 prósent, en það er minnsti vöxtur á einum mánuði í sjö ár. Samtals fjölgaði erlendum ferðamönnum hér á landi um 24 prósent milli ára, en árið á undan því var fjölgunin 40 prósent.

Greiningardeildin líkir uppgangi ferðaþjónustunnar við þroska einstaklings. Einstaklingurinn sé nú kominn á táningsaldurinn og fer því að hægja á vexti hans. Framundan sé þroskaskeið þar sem „álkulegur líkaminn tekur að samsvara sér betur,“ segir í greiningunni.