Vel nýttir 50 fermetrar í glæsilegri stúdíóíbúð

Hulda Aðalsteinsdóttir, innanhússarkitekt hjá Kreatívu, og Auður Gná Ingvarsdóttir, innanhússarkitekt hjá Further North, fengu nýverið þá áskorun að innrétta tæplega 50 m2 rými sem íbúð þar sem hver og einn fermetri er nýttur til hins ýtrasta. Þær leystu verkefnið einstaklega vel af hendi eins og sjá má á meðfylgjandi myndum.

„Við vorum fengnar til að teikna þarna inn litla stúdíóíbúð sem yrði heimili ungrar konu í nokkur ár, á meðan hún er í námi. Gera þurfti ráð fyrir hennar þörfum en um leið að hafa skipulagið þannig að hægt væri að breyta íbúðinni seinna meir, hækka veggi til lofts og búa til aukaherbergi ef til þess kemur.“

„Það var óskað eftir góðu plássi undir föt og gerðum við ráð fyrir fataherbergi.“

Spurðar út í upprunaleg rými segir Auður:

„Um hálfniðurgrafinn kjallara sem hafði verið skipt upp í tvö rými var að ræða. Við vorum fengnar til að teikna þarna inn litla stúdíóíbúð.“

Hulda og Auður lögðu mikla áherslu á að allir hlutar rýmisins myndu flæða vel saman þar sem eldhúsið er eins konar miðpunktur. „Eldhúsið er vel skipulagt með eldavél, ofni, stórum ísskáp, uppþvottavél og góðum vaski ásamt hirslum. Það tengist svo við seturými sem nýtist sem stofa og borðstofa. Við teiknuðum þar upp sófa eða öllu heldur fjölnota fleti sem má setjast á,“ útskýrir Hulda.

Spurðar út í hvort þær lumi á góðum ráðum hvað varðar góða nýtingu á fáum fermetrum segir Hulda: „Við skipulag á svona litlum rýmum skiptir höfuðmáli að hugsa út fyrir það hefðbundna, ekki festa sig við venjulega herbergjaskipan eða hefðbundna nýtingu rýma. Það er hægt að gera lítil rými ótrúlega skemmtileg ef fólk er tilbúið að nálgast verkefnið á þann veg að engar sérstakar reglur séu til staðar, þannig gerast oft skemmtilegustu hlutirnir.“