Óvissustig við Súðavík vegna snjóflóðahættu

Óvissustigi hefur verið lýst yfir við Súðavíkurhlíð í dag vegna snjóflóðahættu. Þrátt fyrir það er leiðin opin að sögn Vegagerðarinnar en rétt að ökumenn sem eiga leið um hlíðina hafi varann á.

Mikil hætta er talin á snjóflóðum á norðanverðum Vestfjörðum þar sem hvassviðri hefur safnað snjó í háa skafla, hlémegin í landi og giljum. Veðurstofan hefur gert stöðugleikaprófanir á svæðinu sem gefið hafa mismunandi niðurstöður. Því þurfi að gera ráð fyrir að eldri snjór sé óstöðugur sumstaðar á þessum slóðum.

Talið er að nýr snjór sem fellur í dag og á morgun geti einnig verið óstöðugur þar sem hann safnast í skafrenningi. Snjóflóð sem féll yfir veg í Bjarnadal í Önundarfirði í liðinni viku sýnir að stöðugleiki í eldri snjónum er ekki alls staðar góður að mati Veðurstofunnar.

Færðin á öðrum vegum landsins er eftirfarandi:

Á Suðvestur- og Suðurlandi er hálka og snjóþekja á flestum leiðum. Þæfingur er á Kjósarskarðsvegi.

Á Vesturlandi er snjóþekja og hálka víðast Ófært er út fyrir nes.

Á Vestfjörðum er snjóþekja, hálka eða þæfingur og þungfært. Fjallvegir á sunnanverðum Vestfjörðum eru ófærir en unnið að mokstri. Nánari fréttir af færð á Vestfjörðum koma svo með morgninum.

Á Norðurlandi er hálka, snjóþekja. Þungfært og skafrenningur er á Mývatns- og Möðrudalsöræfum.

Á Austurlandi er hálka eða snjóþekja og snjókoma. Þæfingsfærð er á Fjarðarheiði. Ófært er á Vatnsskarði eystra. Hálka eða krapi er frá Egilsstöðum og með ströndinni að Vík.