Versta veðrið verður á suðaustur og norðvestur hluta landsins

Appelsínugul viðvörun Veðurstofu Íslands er í gildi fyrir Vestfirði, Strandir, Norðurland vestra og Suðausturland. Gul viðvörun er annars í gildi fyrir allt landið.

Óveðurslægð liggur nú rétt suðaustur af landinu og þokast hún norðaustur í fyrstu og síðan til norðvesturs samkvæmt hugleiðingum veðurfræðings hjá Veðurstofu Íslands. Þegar krappar lægðir eru við landið er veðrið fljótt að breytast ef staðsetning lægðarinnar víkur frá spáðum ferli og því mikilvægt að fylgjast með nýjustu veðurspám.

Verst verður veðrið á suðaustur og norðvestur hluta landsins. Norðvestan rok en úrkomulítið suðaustanlands þegar líður á daginn, en stormur og stórhríð um landið norðvestanvert. Dregur úr vindi og ofankomu annað kvöld. Í öðrum landshlutum verður hægari vindur. Talsverð ofankoma austan og norðanlands fram eftir degi, en síðan úrkomuminna.

Má segja að í dag verði veðrið einna skást á höfuðborgarsvæðinu, en búast má við éljum um tíma eftir hádegi, heldur hvassara í nótt og á morgun og þéttari éljagangur, en dregur úr bæði vindi og éljum annað kvöld. Vægt frost verður víðast hvar á landinu um helgina, en um frostmark við austurströndina. Mikið er um laustan snjó og ekki þarf mikinn vindstyrk til að sá snjór sem fyrir er og sá sem mun falla um helgina ferðist um með lélegu skyggni og erfiðum aksturskilyrðum.

Veðurhorfur á landinu í dag:

Norðaustan hvassviðri eða stormur með talsverðri snjókomu um landið austanvert, en norðantil á landinu eftir hádegi og snýst í norðvestanátt. Norðvestan rok eða jafnvel ofsaveður suðaustanlands síðdegis og þurrt að mestu, en hvassviðri eða stormur um landið norðvestanvert og talsverð eða mikil snjókoma. Hægari vindur og él í öðrum landshlutum.

Norðvestan 18-28 m/s á morgun, hvassast norðvestantil og suðaustanlands. Talsverð eða mikil snjókoma um landið norðvestanvert, en annars él. Hægari vindur og yfirleitt þurrt norðaustantil á landinu. Frost yfirleitt 0 til 5 stig. Dregur úr vindi og ofankomu annað kvöld.

Veðurhorfur á landinu næstu daga:



Á sunnudag:

Norðvestan eða vestan hvassviðri eða stormur og jafnvel rok suðaustantil og norðvestantil á landinu. Víða skafrenningur og él, en talsverð eða mikil snjókoma um landið norðvestanvert. Fer að draga úr vindi og ofankomu síðdegis. Frost 0 til 8 stig.

Á mánudag:

Suðvestlæg átt, 5-13 m/s og él, en léttir til norðaustantil. Harðnandi frost, víða talsvert frost um kvöldið.

Á þriðjudag:

Útlit fyrir breytilega vindátt. Víða snjókoma eða él og minnkandi frost.

Á miðvikudag, fimmtudag og föstudag:

Líkur á austlægri átt með dálitlum éljum. Frost 0 til 7 stig.