Allardyce vonar að Gylfi nái sér fyrr en áætlað er

Gylfi Þór Sigurðsson gæti snúið aftur á fótboltavöllinn fyrr en áætlað var að mati Sam Allardyce, knattspyrnustjóra Everton.

Gylfi meiddist í sigri Everton á Brighton í ensku úrvalsdeildinni um síðustu helgi og Everton gaf frá sér yfirlýsingu í gær þar sem sagt var að Gylfi yrði frá í 6-8 vikur.

Allardyce ræddi málið á blaðamannafundi sínum í morgun og þar sagði hann að sá sem sendi þessa tilkynningu út eigi von á reiðilestri.

„Vonandi verður Gylfi fljótari að jafna sig en við búmst við.“

„Mér hefur alltaf fundist að það eigi ekki að setja tímastimpil á meiðsli. Þú vilt koma í veg fyrir bakslög og ef þú kemst fyrr til baka þá hefur þú staðið þig vel.“

„Leikmenn eru mis fljótir að jafna sig. Gylfi er ákveðinn í því að koma til baka til okkar og íslenska landsliðsins á HM,“ sagði Sam Allardyce.