Jakob atkvæðamikill í tapi Borås

Jakob Örn Sigurðarson var á meðal stigahæstu manna í liði Borås sem tapaði fyrir Jämtland í öðrum leik liðanna í 8-liða úrslitum sænsku úrvalsdeildarinnar í körfubolta.

Jakob skoraði 14 stig á tæpum 30 mínútum en hann byrjaði leikinn á bekknum. Þá átti hann eitt frákast og eina stoðsendingu.

Borås vann fyrsta leikinn á útivelli 92-69 en varð að sætta sig við 73-85 tap á heimavelli sínum. Staðan í einvíginu er því 1-1.

Gestirnir frá Jämtland voru yfir mest allan leikinn og unnu alla fjórðunga leiksins. Þriðji leikurinn í einvíginu er strax á laugardaginn.