Ágreiningur um nýtt knatthús í Hafnarfirði

Pétur Óskarsson, varabæjarfulltrúi Bjartrar framtíðar í Hafnarfirði, gagnrýnir harðlega að honum hafi ásamt Borghildi Sturludóttur, sem einnig er varabæjarfulltrúi BF, verið vikið úr nefndum og ráðum í bæjarstjórninni  vegna ágreinings við meirihlutann eða Sjálfstæðisflokk og tvo bæjarfulltrúa um byggingu á knatthúsi í bænum. Guðlaug Kristjánsdóttir, formaður bæjarráðs Hafnarfjarðar, hafnar því að þeim hafi verið vikið úr embættum vegna þessa.

„Það hefur enginn ágreiningur verið um að það eigi að byggja nýtt knatthús. Ágreiningurinn hefur legið í því að ég og Borghildur vildum að staðarval yrði greint af sérfræðingum og ákvörðun um staðsetningu hússins tekin eftir að hún lægi fyrir. Hins vegar vilja íþróttafélögin, það er að segja FH, bara fá knatthúsið inn á sína lóð. Við vorum ekki sátt við að það yrði gert án þess að vera skoðað í stærra samhengi en það var ekki stemming fyrir því. Þannig að ég held að ég held að ágreiningurinn liggi í þessu. Málið var unnið mjög hratt en það var boðið út knatthús á lóðinni hjá FH. Kostnaðaráætlun sem bærinn hafði nam 720 milljónir króna en tilboðin þrjú sem bárust, sem eru reyndar öll fyrir sama knatthúsið sem formaður FH flytur inn, að þau voru upp á um 1200 milljónir króna,“ segir Pétur.

Guðlaug Kristjánsdóttir formaður bæjarráðs Hafnarfjarðar hafnar þessu alfarið. Í tilkynningu um málið sem hún og Einar Birkir Einarsson sendu frá sér varðandi málið í dag kemur meðal annars fram að áhersla þeirra sé á að bæjarfulltrúar eigi ekki að hafa bein afskipti af fjárhagslegum eða öðrum hagsmunum íþróttafélaganna, heldur eigi samningar að vera skýrir og allt uppi á borðum.  Hún segir af og frá að varabæjarfulltrúunum hafi verið vikið úr embættum vegna ágreinings í málinu.

„Ég vil sem minnst tjá mig um þetta mál en þetta er ekki ástæðan. Það er í besta falli mikil einföldun og ekki það sem varð til þess.“

Haraldur Líndal Haraldsson, bæjarstjóri Hafnarfjarðar, vildi ekki tjá sig um málið þegar fréttastofa leitaði til hans í dag en sagði að hann gerði ráð fyrir að þau tilboð sem hefðu borist í knatthúsið yrðu á dagskrá hjá umhverfis-og framkvæmdasráði bæjarins í næstu viku. Lægsta tilboðið hljóðaði uppá 1102 milljónir króna.

Pétur Óskarsson býst ekki við því að Björt framtíð bjóði fram í Hafnarfirði í sveitarstjórnarkosningum í vor en segir hins vegar að að vika sé langur tími í pólitík.  

Guðlaug Kristjánsdóttir hefur eins og komið hefur fram sagt sig úr Bjartri framtíð og undirbýr nú nýtt óháð framboð fyrir næstu sveitarstjórnarkosningar í Hafnarfirði. Einar Birkir Einarsson sem einnig sagði sig úr Bjartri framtíð sagðist í samtali við fréttastofu ætla að hætta eftir þetta kjörtímabil.