Aron Einar meiddur á hné og ökkla | Fer í myndatöku á morgun

Aron Einar Gunnarsson fór meiddur af velli eftir tíu mínútna leik þegar Cardiff vann 0-2 sigur á Hull í ensku B-deildinni í fótbolta. 



Neil Warnock staðfestir að Aron Einar hafði meiðst á hné og ökkla en alvarleiki meiðslanna er óljós og kemur betur í ljós á morgun þegar landsliðsfyrirliðinn fer í myndatöku.

„Við vitum ekkert fyrr en á morgun. Hann meiddist bæði á ökkla og hné og fór strax í kælingu.“

„Hann fer ekki niður nema hann finni virkilega til svo þetta er áhyggjuefni. Hann var samt ánægður í leikslok og fagnaði með strákunum. Vonandi reynist þetta ekki alvarlegt,“ sagði Warnock.