Upphitun: Baráttan í Bakú

Fjórði kappakstur tímabilsins í Formúlu 1 fer fram um helgina er evrópski kappaksturinn verður haldinn í höfuðborg Aserbaísjan, Bakú. Brautin er öll innanbæjar og því afar þröng og refsar ökumönnum fyrir minnstu mistök. Ráskafli brautarinnar er sá lengsti í mótinu, rúmir tveir kílómetrar þar sem ökumenn standa bíla sína í botni allan tímann.

Formúlan hefur farið líflega á stað í ár og er ómögulegt að sjá fyrir um hvaða ökuþórar lenda í efstu sætunum, eitthvað sem hefur verið að nokkru leyti fyrirsjáanlegt síðastliðin ár.

Í ár eru greinilega þrjú lið að berjast á toppnum - Ferrari, Red Bull og Mercedes. Þýski bílaframleiðandinn hefur unnið titil bílasmiða síðastliðin fjögur ár en á enn eftir að ná sigri árið á nýju tímabili.

Ferrari hefur byrjað best og hefur aðalökumaður liðsins, Sebastian Vettel, unnið tvær af fyrstu þremur keppnunum.

Red Bull sýndi í kínverska kappakstrinum að liðið ætlar sér að berjast um titla í sumar, eitthvað sem enska liðið hefur ekki getað síðastliðin ár. Daniel Ricciardo keyrði þar til sigurs en Ástralinn vann einmitt kappaksturinn í Bakú í fyrra. Ef Ricciardo tekst að verja sigurinn í ár verður það aðeins í annað skiptið á hans ferli sem hann vinnur tvær keppnir í röð.

Hvað er í gangi hjá Mercedes?

Fyrir tímabilið leit út fyrir að Mercedes myndi enn og aftur bera höfuð og herðar yfir aðra keppendur. Það hefur þó ekki verið raunin það sem af er ári, liðið á enn eftir að ná efsta sæti og er það í fyrsta skiptið í fjögur ár sem þýska liðið nær ekki sigri þrjár keppnir í röð. Tímabilið hefur þó ekki verið hræðilegt fyrir Mercedes þar sem liðið leiðir nú keppni bílasmiða, aðeins einu stigi á undan Ferrari.

Keppnin um helgina verður sú þriðja sem fer fram í Aserbaísjan en kappaksturinn var fyrst haldinn árið 2016. Það árið var keppnin afar döpur er Nico Rosberg keyrði Mercedes bíl sinn örugglega til sigurs. Kappaksturinn var harðlega gagnrýndur fyrir tímabilið í fyrra en þá olli hann svo sannarlega ekki vonbrigðum.

Magnaður kappakstur í fyrra

Bakú kappaksturinn á síðasti tímabili var án efa sá skemmtilegasti það tímabil og er ofarlega á lista yfir skemmtilegustu Formúlu 1 keppnir þessarar aldar. Þar náði barátta Lewis Hamilton og Sebastian Vettel nýjum hæðum er Þjóðverjinn keyrði viljandi inn í hlið Mercedes-bíl Lewis fyrir aftan öryggisbifreiðina. Þá sáum við einnig einn flottasta framúrakstur tímabilsins er Daniel Ricciardo nýtti sér tveggja kílómetra ráskaflan og tók framúr þremur bílum í einu í fyrstu beygjunni.

Ricciardo, sem byrjaði kappaksturinn í tíunda sæti, stóð uppi sem sigurvegari í fyrra og Valtteri Bottas varð annar, þrátt fyrir að vera síðastur eftir fyrsta hringinn eftir árekstur við Kimi Raikkonen. Lance Stroll náði mögnuðu þriðja sæti fyrir Williams en hann tapaði þó örðu sætinu fyrir Bottas á síðustu metrunum. Allir þessir ökumenn byrjuðu keppnina í sjötta sæti eða neðar á ráspól.

Það er því ómögulegt að seigja hvað gerist á sunnudaginn en við svo sannarlega vonumst eftir svipaðri flugeldaveislu og í fyrra. Hægt verður að fylgjast með æfingum, tímatökum og svo að sjálfsögðu kappakstrinum sjálfum á Stöð 2 Sport um helgina.