Þarft innlegg í umræðuna um fjármálaáætlun

Aukin fjárþörf Landspítala á árunum 2019 til 2023 miðað við fjármálaáætlun ríkisstjórnarinnar nemur 80 milljörðum króna samkvæmt umsögn Landspítalans. Nefndarmaður Pirata í fjárlaganefnd segir mikilvægt að taka tillit til þessa mats í áframhaldinu.

Í umsögninni sem fjallað var um á Vísi hér í gær, segir að strax á næsta ári vanti átta milljarða aukalega „en alls um 53 milljarða yfir tímabilið í heild.“ Alls 27 milljarða vantar svo aukalega í endurnýjun tækjabúnaðar í núverandi húsnæði, endurbætur á húsnæðinu og svo byggingu nýs húsnæðis.

Gangi fjármálaáætlunin óbreytt í gegn mun það „leiða til samdráttar í þjónustuframboði eða hallarekstrar á Landspítala,“ segir að lokum. Undir umsögnina skrifa Páll Mattíasson, forstjóri Landspítala, og María Heimisdóttir, framkvæmdastjóri fjármálasviðs.

Veikleikar í fjármálaáætluninni

Björn Leví Gunnarsson nefndarmaður Pírata í fjárlaganefnd segir þetta mikilvægt mat.

„Matið frá Landspítalanum hefur hingað til verið mjög nákvæmt í rauninni og það er mjög ánægjulegt að fá svona fimm ára mat fram í tímann. Þá getum við betur skoðað hvernig þetta þróast eftir árum. Þetta er þarft innlegg í umræðuna um fjármálaáætlun.“ Hann segir lítinn tíma til að bregðast við.

„Þetta eru tvímælalaust faglegar upplýsingar innan úr spítalanum og heilbrigðiskerfinu hvar veikleikar eru í fjármálaáætluninni. Þannig að það er óhjákvæmilegt að við þurfum að skoða þetta betur og eins og ég sagði áðan þá hef ég enga ástæðu til að halda að þetta sé eitthvað ónákvæmt mat hjá þeim.“

Björn segir að það sé miður að svona stuttur tími gefist til að fara yfir málið.

„Okkur er eiginlega svolítið stillt upp við vegg hvað varðar tímasetningar, að klára þetta. Ég á enn eftir að sjá að ríkisstjórnin komi með tillögur á fjármálaáætlun, það hefur ekki gerst ennþá þannig að ég hlakka til að sjá hvaða viðbrögð þau hafa við þessu.“