Þrenna hjá Söndru og meistararnir byrja á sigri

Ríkjandi Íslandsmeistarar Þór/KA byrja titilvörnina á 5-0 sigri en liðið vann öruggan sigur á Grindavík i fyrstu umferð Pepsi-deildar kvenna.

Sandra María Jessen er komin aftur í lið Þór/KA en hún var á láni hjá Slavia Prag í vetur. Hún opnaði markareikninginn strax á sjöundu mínútu .

Staðan var 1-0 í hálfleik en Arna Sif Ásgrímsdóttir tvöfaldaði forystuna á 55. mínútu en Arna sneri aftur heim til Þór/KA fyrir tímabilið eftir að hafa leikið með Val.

Sandra Stephany Mayor Gutierrez, borgarstjórinn, kom Þór/KA svo í 3-0 eftir klukkutímaleik og Sandra María Jessen bætti við tveimur mörkum áður en yfir lauk. Þrenna hjá Söndru og lokatölur 5-0.

Valur, Þór/KA, Breiðablik og HK/Víkingur eru því með þrjú stig eftir fyrstu umferðina en leik ÍBV og KR var frestað vegna veðurs.

Úrslit og markaskorarar eru fengnir frá úrslit.net.