Badmintonspilarar í langt bann

Tveir hnitspilarar frá Malasíu fá ekki að spila badminton aftur sem atvinnumenn eftir að hafa hagrætt úrslitum.

Tan Chun Seang, 31 árs, og fyrrum heimsmeistari unglinga, Zulfadli Zulkiffli, 25 ára, fengu 15 og 20 ára bann. Þeir verða orðnir of gamlir til að keppa sem atvinnumenn er banninu lýkur.

Óháður dómstóll komst að því að þeir höfðu stundað þetta svindl til lengri tíma eða allt frá árinu 2013.

Þetta er í fyrsta skipti sem svona mál kemur upp í badminton-heiminum. Á dögunum kom samt upp svipað mál í Malasíu er danskir hnitspilarar greindu frá því að maður frá Malasíu hefði boðið þeim peninga fyrir að tapa.