Fyrstu laxarnir mættir í árnar

Laxveiðin hefst í byrjun júní og það er mikil spenna sem fylgir hverri opnun þegar það þá kemur í ljós hvort laxinn sé mættur í árnar.

Það hefur nú þegar kvisast út orðrómur og fréttir þess efnis að laxar hafi sést í Laxá í Kjós og í Leirá.  Það er ekkert óvenjulegt að lax sjáist í Kjósinni um þetta leiti þó þetta sé heldur snemma í maí en þarf ekki að vera neitt óvenjulegt.  Bubbi Morthens Kjósarbúi með meiru er duglegur að skima í ánni á þessum tíma til að sjá fyrstu laxana og það var ekkert öðruvísi á þessu ári en fyrsti laxinn bar við augu Bubba einhvers staðar neðan við Kvíslafoss. 

Það er svo spurning hvort að þetta verði eins og í fyrra þar sem göngurnar voru mjög snemma á ferðinni á vesturlandi og að sama skapi liggur spurningin í loftinu með hvernig heimtur verði úr hafi?  Mælingar sýndu fram á góðann og heilbrigðan seiðabúskap í þeim seiðum sem fóru til sjávar í fyrra og hafi hafið tekið vel á móti þeim getum við vonandi átt von á sterkum göngum í sumar.