Svona var stemningin: Íslendingar hituðu upp í geggjuðum garði í Moskvu

Það má búast við rafmagnaðri stemningu þegar sendiráð Íslands í Moskvu, Íslandsstofa og Tólfan bjóða stuðningsfólki íslenska landsliðsins, sem og gestum og gangandi, til upphitunar fyrir leik Íslands og Argentínu í dag í Zaryadye-garðinum í hjarta rússnesku höfuðborgarinnar. 

Þar hitar Tólfan, stuðningsmannafélag íslensku landsliðanna, upp fyrir leikinn með víkingaklappinu víðfræga. Auk þess stíga á svið tónlistarmennirnir og bræðurnir Jón Jónsson og Friðrik Dór.
 Reiknað er með því að Íslendingar fjölmenni en þeir telja nokkur þúsund hér í Moskvu. 

Zaryadye-garðurinn er í hjarta miðborgarinnar, rétt við Rauða torgið og Kreml. Gleðin hefst klukkan ellefu að staðartíma (átta að íslenskum tíma) og stendur í tvo tíma. Þá munu stuðningsmenn flykkjast á völlinn en mikilvægt er að vera tímanlega í því.

Arnar Björnsson, Björn Guðgeir Sigurðsson og Kolbeinn Tumi Daðason verða í garðinum og taka Íslendinga tali. 

Beinni útsendingu er lokið en upptöku má sjá hér fyrir neðan.