Ágreiningur leystur og Sigtryggur Arnar skrifar undir hjá Grindavík

Sigtryggur Arnar Björnsson mun skrifa undir samning við Grindavík í kvöld. Hann staðfesti þetta við mbl.is í dag.

Vísir greindi frá því í gær að Sigtryggur Arnar, sem var einn besti leikmaður Domino's deildarinnar á síðasta tímabili og var valinn í úrvalslið deildarinnar, væri í samningaviðræðum við Grindvíkinga þrátt fyrir að Tindastóll teldi leikmanninn samningsbundinn sér.

Samkvæmt heimildum íþróttadeildar leystu félögin ágreininginn sín á milli.

Sigtryggur Arnar sagði í samtali við mbl.is að breytingar á liði Tindastóls hafi átt stóran þátt í ákvörðun hans að yfirgefa félagið en hann var einn lykilmanna liðsins sem tryggði sér sinn fyrsta titil á síðasta tímabili þegar liðið varð bikarmeistari.