Ótrúleg spenna þegar magnað Formúlutímabil er hálfnað

Keppni í Formúlu 1 er hálfnuð og hefur tímabilið til þessa verið hreint út sagt magnað. Slagurinn milli Sebastian Vettel og Lewis Hamilton er ótrúlegur og í fyrsta skipti síðan Turbo-Hybrid bílarnir voru kynntir til sögunnar árið 2014 eru tvö lið sem eiga raunhæfa möguleika á titli.

Það er ekki bara slagur á toppnum, Red Bull virðist vera nokkuð öruggt í þriðja sætinu en þar á eftir er slagurinn ekki síðri en um fyrsta sætið. 

12 keppnum af 21 er lokið og er Formúlan í sumarfríi. Því er við hæfi að fara aðeins yfir stöðu mála. Hér ætlum við að fara yfir gengi liðanna það sem af er ári miðað við þær væntingar sem liðin og áhorfendur höfðu fyrir tímabil.

Mercedes, 1. sæti með 345 stig

Allt annað en sigur hefði verið óásættanlegt fyrir þýska bílaframleiðandann fyrir tímabilið. Mercedes hefur unnið fimm keppnir í ár gegn fjórum sigrum Ferrari. Munurinn á liðunum í stigakeppninni eru aðeins 10 stig og má seigja að það séu ákveðin vonbrigði fyrir Mercedes miðað við þá yfirburði sem liðið hafði síðustu ár.

Ferrari, 2. sæti með 335 stig

Tímabilið er búið að vera frábært fyrir ítalska liðið það sem af er. Það man þó enginn eftir liði sem lendir í öðru sæti og verða Sebastian Vettel og Kimi Raikkonen því að sjá til þess að liðið endi með pálmann í höndunum. Ítalirnir unnu síðast titil bílasmiða fyrir tíu árum síðan sem er algjörlega óásættanlegt fyrir lið eins of Ferrari.

Red Bull, 3. sæti með 223 stig

Enska liðið á enn stærðfræðilegan möguleika á báðum titlum, en bilið í fyrsta sætið er þó orðið alltof mikið fyrir lið sem ætlaði sér að berjast um titla í ár. Red Bull bíllinn er hraður, en það virðist þó alltaf vanta örlítið upp á aflið í Renault vélinni. Liðið hefur unnið þrjár keppnir í ár, aðeins einni keppni minna en Ferrari, en er samt sem áður 112 stigum á eftir þeim ítölsku í keppni bílasmiða.

Renault, 4. sæti með 82 stig

Franski bílaframleiðandinn hélt því fram fyrir tveimur árum að liðið verði að keppa um titil árið 2020. Allt virðist ganga samkvæmt áætlun og hefur liðið meira að seigja krækt í Daniel Ricciardo frá Red Bull fyrir næsta tímabil. Renault virðist vera með talsverða yfirburði í keppninni um fjórða sætið en á ennþá töluvert í land til að keppa um titla.

Haas, 5. sæti með 66 stig

Það er alveg magnað hvað bandaríska liðið nær að gera með því litla fjármagni sem það hefur milli handanna. Síðastliðin ár hefur liðið ávalt endað ofar væntingum og lítur út fyrir að 2018 verði eins. Haas væri sennilega í baráttu um fjórða sætið ef ökumenn liðsins, þá sérstaklega Romain Grosjean, hefðu gert færri mistök.

Force India, 6. sæti með 59 stig

Miðað við magnað fjórða sæti í keppni bílasmiða í fyrra er sjötta sætið núna frekar slapt. En ef tekið er með í reikninginn að liðið er sem stendur gjaldþrota verður að seigjast að sjötta sætið er bara nokkuð gott. Force India er án efa með bestu ökumennina af þeim liðum sem eru að berjast á botninum. Sergio Perez tókst meira að seigja að koma bleika bílnum á verðlaunapall í Baku.

McLaren, 7. sæti með 52 stig

Fyrir tímabilið náði McLaren loksins að losa sig við Honda vélarnar sem hafa verið að gera þeim lífið leitt undanfarin ár. Með Renault vél var búist við að liðið færi að keppa við Red Bull á toppnum en það hefur svo sannarlega ekki verið raunin. Sjöunda sætið er vægt til orða tekið slakur árangur fyrir lið sem fullyrti að þeirra bíll væri sá besti fyrir ári síðan.

Toro Rosso, 8. sæti með 28 stig

Ítalska liðið tók við Honda vélunum af McLaren fyrir tímabilið. Honda hefur tekist að bæta afl vélarinnar umtalsvert en það virtist koma á kostnað endingar. Nú þegar er búið að skipta um alla hluti vélarinnar í báðum bílum margoft. Það þýðir að Toro Rosso munu halda áfram að fá refsingar og verður árangurinn eftir því.

Sauber, 9. sæti með 18 stig

Ljósið í myrkrinu hjá Sauber er hinn tvítugi Charles Leclerc. Árangur hans á Sauber bílnum hefur verið algjörlega magnaður og hefur hann krækt í rúmlega 70 prósent stiga liðsins. Bíllinn virðist þó vera betri en í fyrra og með meiri stuðningi frá Ferrari er framtíðin björt hjá svissneska liðinu.

Williams, 10. sæti með 4 stig

Það er alveg grátlegt að sjá þetta sögufræga lið á botninum. Ekkert virðist ganga á hjá Williams í ár, bíllinn er hægur og illa höndlandi og ökumennirnir óreyndir. Þetta er ekki góð blanda og er árangurinn eftir því.

Nú þegar níu keppnir eru eftir af tímabilinu er erfitt sjá hvort að það verði Ferrari eða Mercedes sem mun standa uppi sem sigurvegari.

Eitt er víst, að slagurinn milli þeirra Vettel og Hamilton á bara eftir að aukast er þeir berjast um að verða besti ökumaður þessarar kynslóðar.