Vidal og Barcelona hafa komist að munnlegu samkomulagi

Miðjumaðurinn Arturo Vidal er á leið til Barcelona. Þegar hefur náðst munnlegt samkomulag á milli Vidal og spænsku meistaranna er segir á vef Guardian.

Talið er að Barcelona þurfi að greiða 27 milljónir fyrir Sílemanninn, en hann hefur leikið fyrir Bayern Munich frá árinu 2015.

Vidal sem er 31 árs gamall hefur verið lykilmaður í liði Bayer. Hann spilaði 35 leiki fyrir liðið á síðustu leiktíð og skoraði í þeim sex mörk.

Ef kaupin ganga í gegn verður Vidal fjórði leikmaðurinn sem Barcelona fær til sín fyrir komandi tímabil, en liðið hefur þegar eytt yfir 100 milljónum punda í Clément Lenglet, Arthur og Malcom.