Vill að atvinnulífið brúi bilið á milli langþreyttra foreldra og skólasetninga í miðri viku

Formaður Félags grunnskólakennara segir mikilvægt að atvinnulífið komi til móts við vinnandi foreldra sem þurfa að ráðstafa börnum sínum síðustu dagana fyrir skólasetningar. Hún leggur til að kveðið verði á um slík frí í kjarasamningum. Stærstu sveitarfélögin segja skólasetningar í miðri viku skrifast á lögbundinn fjölda skóladaga, kjarasamninga kennara og skólana sjálfa.

Færsla Þorbjargar Helgu Vigfúsdóttur, fyrrverandi borgarfulltrúa Sjálfstæðisflokksins, um skólasetningar grunnskóla landsins vakti mikla athygli í gær. Í færslunni sagði Þorbjörg að sér væri fyrirmunað að skilja hvers vegna grunnskólar væru ítrekað settir í miðri viku þegar engin námskeið eru í boði fyrir börn.

Svörin í atvinnulífinu en ekki í skólastarfinu

Þorgerður Laufey Diðriksdóttir, formaður Félags grunnskólakennara, segir umræðuna koma upp á hverju einasta ári, að hausti og svo aftur á vorin. Hún segir að togstreituna megi að miklu leyti rekja til breytinga á vinnumarkaði, og þá helst til aukinnar atvinnuþátttöku beggja foreldra. Hún gagnrýnir jafnframt að kennarar séu gerðir ábyrgir fyrir millibilsástandinu sem skapast síðustu dagana fyrir skólasetningar- og slit.

„Ég myndi þá leggja til að þetta væri eitt af því sem horft yrði til í kjarasamningum fram undan, að foreldrar hefðu sveigjanlegri tíma til að geta sinnt börnum sínum á þessum tímabilum þegar er verið að fara úr einu skólastigi yfir í annað, sem dæmi. Að haga því þannig að sumarfrí sem foreldri vinnur sér inn sé ekki það eina sem er í boði fyrir vinnandi fólk með börn á þessum aldri,“ segir  Þorgerður.

„Ég held að svörin séu í atvinnulífinu. Svörin liggja ekki í skólastarfinu sem slíku vegna þess að skólarnir vinna undir lögbundnum skyldum um 180 skóladaga. Það hefur einnig sýnt sig að skóladagafjöldi íslenskra barna er á pari við önnur lönd sem við berum okkur saman við.“

 

Af hverju eru skólasetningar í miðri viku?

Vísir sendi fyrirspurnir á þrjú sveitarfélög vegna gagnrýni Þorbjargar í gær. Voru sveitarfélögin innt eftir því af hverju starf í grunnskólum hefjist í miðri viku en ekki í upphafi viku.

Reykjavík

Í svari Reykjavíkurborgar, stærsta sveitarfélags landsins, kemur fram að skóladagar á tímabilinu 20. ágúst til 10. júní ár hvert skuli vera 180 talsins, líkt og kveðið er á um í kjarasamningi sveitarfélaga við Kennarasamband Íslands. Í flestum tilvikum sé ekki hægt að kalla kennara til starfa fyrr en í kringum 15. ágúst og þá taki við fimm starfsdagar áður en kennsla hefst, jafnan í kringum 22. ágúst.

„Skólasetningin 22. ágúst hefur því fallið á flesta virka daga vikunnar á undanförnum árum í grunnskólum borgarinnar,“ segir jafnframt í svari Reykjavíkurborgar. Þá er einnig bent á að grunnskólar Reykjavíkur hafi faglegt sjálfstæði og ákveði sjálfir tímasetningu fyrir skólasetningar og mætingar bekkjardeilda eða árganga fyrsta skóladaginn.

Kópavogur

Í svari frá Kópavogsbæ segir að grunnskólar í sveitarfélaginu hefji göngu sína fimmtudaginn 23. ágúst, degi síðar en skólar í Reykjavík. „Grunnskólar hafa frelsi til að velja hversu margir starfsdagar eru fyrir skólasetningu og hversu margir eftir skólaslit. Það verða því færri dagar í júní að loknum skólaslitum.“

Akureyri

Á Akureyri ákveður fræðsluráð Akureyrarkaupstaðar að öllu jöfnu í mars ár hver hvenær grunnskólar hefjast að hausti, að fenginni tillögu skólastjórnenda. Þá er einnig vísað í kjarasamning grunnskólakennara og þannig miðað við að ekki megi kalla kennarana til starfa eftir sumarleyfi fyrr en 15. ágúst. Með tilliti til þess verður skóli settur á Akureyri þriðjudaginn 21. ágúst.

„Ekki hefur borist ósk frá fulltrúum foreldra í skólaráðum grunnskólanna um ákveðinn dag sem upphafsdag skólaársins en í skólaráðunum er vettvangur fyrir skoðanaskipti og tillögur að breytingum á skóladagatali næsta árs þegar það er í vinnslu. Það sem hentar einum þetta árið þarf ekki að henta þeim sama það næsta né öðrum foreldrum. Engin haldbær rök liggja fyrir um á hvaða vikudegi best er fyrir börnin eða foreldra þeirra að hefja skólagöngu á haustin,“ segir enn fremur í svari Akureyrarbæjar.