Segir Bandaríkin stinga Tyrki í bakið

Recep Tayyip Erdogan, forseti Tyrklands, var harðorður í garð Bandaríkjanna á blaðamannafundi í dag þar sem hann sakaði ríkisstjórn Donald Trump um tvískinnung. Annars vegar höguðu Bandaríkin sér sem bandamenn Tyrklands en hins vegar væru þeir að stinga Tyrki í bakið.

„Við erum saman í NATO en svo reynið þið að stinga bandamenn ykkar í bakið,“ sagði Erdogan.

Miklar deilur

Gagnrýni Erdogan á rætur sínar að rekja til viðskiptaþvingana sem Bandaríkin hafa beitt gegn Tyrklandi, í kjölfar þess að Tyrkir hafa neitað að frelsa bandarískan prest úr haldi. Presturinn, Andrew Brunson er sakaður um njósnir og stuðning við hryðjuverkasamtök og hefur verið í fangelsi í tvö ár en gagnrýnendur Tyrklands segja hann vera gísl ríkisstjórnar Erdogan.

Tyrkir hafi reynt að nota Brunson til þess að fá Bandaríkin til að framselja Fetullah Gulen til Tyrklands. Erdogan hefur sakað Gulen um að skipuleggja misheppnað valdarán fyrir tveimur árum.

Stuðningur Bandaríkjanna við sýrlenska Kúrda hefur einnig reitt Tyrki.

Útlit fyrir kreppu

Áðurnefndar viðskiptaþvinganir hafa leit til mikil hruns tyrknesku lírunnar og ýtt undir þann efnahagsóstöðugleika sem var til staðar í Tyrklandi. Virði hlutabréfa hefur lækkað verulega að undanförnu og á einu ári hefur verðbólga í Tyrklandi verið um 15 prósent.

Samkvæmt BBC óttast sérfræðingar að Tyrkir stefni að efnahagskreppu.



Fyrirtæki hafa fengið mörg og stór lán á undanförnum árum og fall lírunnar getur leitt til þess að erfitt verði fyrir fyrirtækin að greiða þessi lán.

Erdogan heldur því þó fram að efnahagsaðstæðum sé ekki um að kenna, heldur sé Tyrkland að verða fyrir árás óvinveittra afla. Hann segir undirstöður Tyrklands vera sterkar og segir Tyrkjum ekki að hafa áhyggjur.

Innanríkisráðuneyti Tyrklands hefur þó ákveðið að grípa til lagalegra aðgerða gagnvart 346 einstaklingum fyrir færslur þeirra á Instagram um ástand lírunnar, sem ráðuneytið segir vera „egnandi“.