United þarf að borga rúman milljarð til að reka Mourinho

Sæti Jose Mourinho er orðið mjög heitt og verður hann fyrsti stjórinn til þess að missa starf sitt í vetur ef marka má veðbanka á Englandi. Gangi það eftir mun veski forráðamanna Manchester United léttast umtalsvert því það mun kosta fúlgur fjár að reka Mourinho.

Sumarið var erfiður tími fyrir stuðningsmenn United og tímabilið byrjar ekkert sérstaklega vel. Mourinho gerði lítið annað en að kvarta og kveina í fjölmiðlum allt undirbúningstímabilið. Það gekk illa að fá inn nýja leikmenn og meint ósætti Mourinho og Paul Pogba prýddi forsíður blaðanna.

United vann opnunarleik ensku úrvalsdeildarinnar gegn Leicester, en spilamennskan heillaði lítið og ummæli Paul Pogba eftir leik áttu forsíðurnar. Liðið tapaði svo fyrir Brighton í annari umferðinni um helgina þar sem liðið sýndi lítinn sigurvilja.

Fleiri og fleiri stuðningsmenn United vilja Portúgalann burt. Sérfræðingar á Englandi eru farnir að spá því að hann verði rekinn fyrir jól. Fréttir af slæmu sambandi Mourinho og leikmanna liðsins skjóta upp kollinum aftur og aftur.

En tíma forráðamenn United að reka Mourinho?

Þegar Portúgalinn kom til liðsins í maí 2016 skrifaði hann undir þriggja ára samning sem hefði runnið út næsta vor. Hann skrifaði hins vegar undir nýjan samning við félagið í janúar. Sá samningur heldur Mourinho á Old Trafford til 2020 með klásúlu um möguleikann á auka ári, sem verður þó líklega ekki nýtt miðað við ástandið í dag.

Í nýja samningnum er einnig klásúla sem segir að verði samningnum rift þurfi United að borga Mourinho 12 milljónir punda.

Louis van Gaal var rekinn nokkrum dögum áður en Jose Mourinho var ráðinn til United fyrir tveimur árum. Það tók hins vegar langan tíma að semja um starfslokasamning við Hollendinginn og kostaði United á endanum 8,4 milljónir punda. Til þess að sleppa við langt samningaferli ef Mourinho yrði rekinn setti United þessa klásúlu inn í samning Portúgalans.

„Van Gaal hélt í hverja krónu en meira að segja United þarf að draga línuna einhverstaðar með Jose,“ er haft eftir heimild innan félagsins í grein The Sun.

Chelsea þurfti að borga Mourinho 8,3 milljónir þegar hann var rekinn þaðan og er talið að Mourinho hafi fengið samtals 35 milljónir punda í starfslokafé á ferlinum.

Síðan Sir Alex Ferguson hætti sem stjóri United árið 2013 hefur United borgað 13,6 milljónir í starfslokasamninga til knattspyrnustjóra; 8,4 milljónir til van Gaal og 5,2 milljónir til David Moyes.

Þrátt fyrir að þéna gríðarlegar upphæðir á ári hverju er eyðsla félagsins einnig mjög mikil. Félagið borgar á bilinu 2-3 milljónir punda á viku í laun leikmanna og Mourinho er talinn vera með 250 þúsund pund í vikulaun. United kom þó út í plús á síðasta ári, svo kannski vega þessar 12 milljónir ekki það stórt í huga forráðamanna United þegar þeir velta fyrir sér hvort eigi að reka knattspyrnustjórann. Sérstaklega í ljósi þess að í dag bárust fréttir af því að hlutabréf í félaginu hafa aldrei kostað eins mikið og félagið því aldrei verið verðmætara.

Mourinho fær fyrsta stóra prófið á tímabilinu næsta mánudagskvöld þegar liðið mætir Tottenham á heimavelli.