Undirbúið ykkur fyrir LeBron rússíbanann

LeBron James er fluttur til Los Angeles og ætlar að spila með NBA-liði Los Angeles Lakers næstu árin. Fyrrum liðsfélagi LeBrons varar leikmenn Lakers við því sem fylgir því að spila í sama liði og LeBron James.

Channing Frye spilaði með LeBron James hjá Cleveland Cavaliers áður en honum var skipt til Los Angeles Lakers á miðju síðasta tímabili. Hann kláraði tímabilið í LA en hefur nú aftur samið við Cavaliers og spilar því ekki með James í vetur.

The lights are brighter with LABron. pic.twitter.com/CJz2y6y6JF

— SportsCenter (@SportsCenter) August 21, 2018

Channing Frye þekkir því vel nýju liðsfélaga LeBron James og hefur notað tækifærið til að benda þeim á það að veröld þeirra breytist um leið og þeir setjast í LeBron rússíbanann.

LeBron James kallar á gríðatlega mikla athygli og um leið eykst athyglin mikið á liðsfélögum hans. Í liði Lakers eru fullt af ungum og efnilegum körfuboltamönnum sem þekkja ekki slíka rússíbanaferð á eigin skinni.

„Undirbúið ykkur fyrir alla athyglina sem kemur með LeBron og alla ábyrgðina sem henni fylgir. Ef þið eruð með eina milljón fylgendur á Instagram búið ykkur þá undir það að vera komnir með tvær milljónir,“ sagði hinn 35 ára gamli Channing Frye.

Channing Frye var orðinn þrítugur og búinn að spila í NBA í mörg ár áður en hann settist í LeBron rússíbanann. Hann var því í mun betri stöðu að ráða við þessa athygli og ábyrgð. Það er hins vegar ekkert skrýtið að hann vari unga og óharnaða Lakers stráka við því sem koma skal.