„Engin vandamál“ á milli Mourinho og Pogba

Jose Mourinho tók varafyrirliðabandið af Paul Pogba í gær en segir samt að það séu „engin vandamál“ á milli þeirra tveggja.

Í gær staðfesti Mourinho að Pogba muni aldrei aftur bera fyrirliðaband Manchester United, að minnsta kosti ekki á meðan Portúgalinn er við stjórnina hjá félaginu.

Þessar fréttir bárust fyrir leik United og Derby í enska deildarbikarnum í gær. Eftir leikinn, þar sem Derby vann í vítaspyrnukeppni, sagði Mourinho að það væri ekkert ósætti á milli hans og Frakkans.

„Eini sannleikurinn er sá að ég ákvað að hann væri ekki varafyrirliði lengur, en það er ekkert ósætti, engin vandamál,“ sagði Mourinho eftir leikinn.

„Ég er stjórinn, ég get tekið þessar ákvarðanir.“