Emery: Bestu lið í heimi eru í ensku úrvalsdeildinni

Bestu leikmenn og lið heimsfótboltans er að finna í ensku úrvalsdeildinni. Þetta er mat Unai Emery, knattspyrnustjóra Arsenal.

Spánverjinn var mættur á lokahóf FIFA í Lundúnum í gærkvöld þar sem Luka Modric var valinn besti leikmaður heims.

Emery tók við Arsenal í sumar, hans fyrsta starf í ensku úrvalsdeildinni.

„Það eru frábær lið hérna og hver einasti leikur er erfiður,“ sagði Emery.

„Þetta eru mjög góðir leikmenn, ég held að bestu leikmenn og bestu lið heims í fótbolta séu hér.“

Eftir tap í fyrstu leikjum Arsenal hefur Emery náð í sigur í síðustu fimm leikjum í öllum keppnum, fjórir í deildinni og einn í Evrópudeildinni.

„Leikmennirnir hafa sýnt það frá fyrsta degi að þeir eru að reyna sitt besta. Ég held við séum að bæta okkur á hverjum degi og ég er mjög ánægður,“ sagði Unai Emery.