La Liga kærir spænska knattspyrnusambandið

Forráðamenn La Liga deildarinnar á Spáni hafa farið fyrir dómstóla með málið um hvort spila megi leik í deildinni í Bandaríkjunum.

Spænska knattspyrnusambandið er á móti áætlunum deildarinnar um að spila einn leik á ári í Bandaríkjunum. La Liga hefur hunsað mótmæli knattspyrnusambandsins og haldið áfram skipulagningu á leiknum, Girona og Barcelona eiga að mætast í Miami í Flórída 26. janúar.

Þrátt fyrir allt sem La Liga hefur gert í undirbúningi leiksins þá stendur eftir sú staðreynd að knattspyrnusambandið þarf að gefa leyfi fyrir framkvæmd leiksins, sem það hefur ekki gert.

Nú hafa forráðamenn deildarinnar brugðið á það ráð að kæra knattspyrnusambandið til þess að neyða fram samþykki fyrir leiknum.

Auk samþykkis knattspyrnusambandsins þurfa FIFA, knattspyrnusamband Bandaríkjanna og knattspyrnusamband Norður-Ameríku einnig að samþykkja framkvæmd leiksins.

La Liga hefur áður sagst ætla að fara fyrir íþróttadómstólinn ákveði FIFA að mótmæla leiknum.