Tíu fyrrverandi starfsmenn Danske bank handteknir

Eistnesk yfirvöld hafa handtekið tíu fyrrverandi starfsmenn Danske bank sem eru grunaðir um að hafa liðkað til fyrir peningaþvætti í gegnum útibú danska bankans þar. Fleiri handtökur í tengslum við þetta stærsta fjárglæpamál Danmerkur eru sagðar í farvatninu.

Talið er að um 200 milljarðar evra frá Rússlandi og fyrrum Sovétlýðveldum hafi verið þvættaðar í útibúi Danske bank í Tallinn frá 2007 til 2015. Starfsmennirnir tíu sem voru handteknir voru allir viðskiptastjórar hjá bankanum.

Saksóknararnir segja að grunur leiki á að þeir hafi vísvitandi gert viðskiptavinum kleift að færa þvegið fé, að því er segir í frétt Financial Times. Einn þeirra er einnig grunaður um að hafa tekið við mútum og annar um að hafa aðstoðað við mútugreiðslur.

Mennirnir, sem eru allir Eistar, eru fyrstu einstaklingarnir sem eru handteknir en danska fjármálaeftirlitið hafði áður ákært Danske bank sjálfan í síðasta mánuði. Ekki liggur fyrir hvort æðstu stjórnendur verði ákærðir þar. Bandaríska dómsmálaráðuneytið hefur einnig hafið rannsókn á peningaþvætti Danske bank.

Forstjóri og stjórnarformaður Danske bank sögðu af sér vegna hneykslisins fyrr á þessu ári. Bankinn gæti átt yfir höfði sér svimandi háa sekt frá bandarískum yfirvöldum.