Innlendar fréttir ársins: Upptökur, afsagnir og eldsvoðar

Eldsvoðar, fíkniefnasmygl, klaustursupptökur, aksturskostnaður og rafmynt eru meðal þess sem setti svip sinn á Vísi þegar kom að innlendum fréttum ársins.

Hér fyrir neðan má sjá samantekt yfir þær innlendu fréttir sem vöktu hvað mesta athygli lesenda á árinu, en listinn er langt frá því að vera tæmandi.

Sunna Elvira

Í byrjun árs varð Sunna Elvira Þorkelsdóttir þjóðþekkt eftir mikið áfall. Sunna féll niður um fjóra metra á heimili sínu í Málaga á Spáni í janúar. Sunna lamaðist fyrir neðan háls og var söfnun hrundið af stað til að koma Sunnu Elviru heim til Íslands með sjúkraflugi. 

Brösulega gekk að koma Sunnu Elviru á hátæknisjúkrahús og það var ekki fyrr en í apríl sem Sunna komst loks heim til Íslands og í endurhæfingu á Grensás. Málið var á köflum reyfarakennt en fyrrverandi eiginmaður hennar var flæktur í umfangsmikið fíkniefnasmygl og móðir hennar var ákærð fyrir skattalagabrot, en að lokum var fallið frá ákæru á hendur henni. 

Í viðtali við Ísland í dag í nóvember sagðist Sunna hafa reynt að komast að því hvað kom fyrir þegar hún féll fram af svölum með aðstoð sálfræðings en án árangurs.

Fjögur hjól undir bílnum og 36 hringir kringum landið

Mörgum blöskraði þegar í ljós kom að Ásmundur Friðriksson, þingmaður Sjálfstæðisflokksins, hefði keyrt því sem samsvaraði tæplega 36 hringi í kringum landið á síðasta ári samkvæmt endurgreiðslum á aksturskostnaði frá Alþingi. Í raun kom í ljós að Alþingi endurgreiddi tíu þingmönnum tæpar 30 milljónir vegna aksturskostnaðar á síðasta ári. Þetta kom í ljós eftir að Björn Leví Gunnarsson, þingmaður Pírata, lagði fram fyrirspurn þess efnis.

Að lokum var allur launakostnaður Alþingismanna frá árinu 2007 birtur á vef Alþingis.

Stórbrunar í Garðabæ og Selfossi

Svo virðist sem nær öll þjóðin hafi verið límd við tölvuskjáinn þann 5. apríl þegar stórbruni varð í Miðhrauni í Garðabæ, en bein lýsing frá brunanum var langmest lesna frétt Vísis á árinu. Enginn slasaðist alvarlega í eldsvoðanum.

Allt tiltækt lið slökkviliðs var kallað út en fljótlega varð ljóst að um mikinn eldsvoða var að ræða. Svartan og þykkan reykjarmökk lá frá húsnæðinu sem staðsett er í Miðhrauni 4 í Garðabæ. Sást reykurinn víða að á höfuðborgarsvæðinu.

Í húsnæðinu voru um tvö hundruð geymslurými á vegum Geymslna ehf, lager og verslun Icewear sem og hluti starfsemi Marels. Starfsmenn Marels og Icewear áttu fótum sínum fjör að launa en starfsmenn Icewear þurftu sumir hverjir að braut upp hurðir og flýja út um glugga undan eldinum.

Þá létust tveir þegar eldur kom upp í einbýlishúsi á Selfossi þann 31. október síðastliðinn. Tvö voru handtekin á vettvangi og einn situr enn í gæsluvarðhaldi grunaður um að hafa valdið eldsvoðanum. 

Sósíalistar í borgarstjórn og metfjöldi kvenna

Þriðja árið í röð gengu Íslendingar að kjörkössunum en í þetta skiptið voru það sveitarstjórnarkosningar, en ekki alþingiskosningar. Allt stefndi í sögulegt prófkjör hjá Sjálfstæðismönnum í Eyjum en allt kom fyrir ekki. Að lokum myndaði klofningsframboðið H-listinn meirihluta með Eyjalistanum og Sjálfstæðismenn sátu eftir í kuldanum. 

Sósíalistaflokkur Íslands náði manni inn í Reykjavík og þar hélt meirihlutinn velli þegar Viðreisn steig inn í staðinn fyrir Bjarta framtíð sem bauð ekki fram.

Hlutfall kvenna í sveitarstjórnum hækkaði og er það hærra en nokkru sinni fyrr. Kjörsókn var langminnst í Reykjanesbæ og þar féll meirihlutinn eins og víðar á landinu.

Sögulegur sýknudómur

Söguleg stund var í Hæstarétti þann 27. september þegar Sævar Marinó Ciesielski, Tryggvi Rúnar Leifsson, Kristján Viðar Júlíusson, Guðjón Skarphéðinsson og Albert Klahn Skaftason voru sýknaðir af ákærum um að hafa orðið þeim Guðmundi Einarssyni og Geirfinni Einarssyni að bana árið 1974. Það var lendingin í endurupptöku eins frægasta sakamáls Íslandssögunnar.

Lík þeirra Guðmundar og Geirfinns hafa aldrei fundist, ekkert er vitað um dánarorsök, engin ummerki hafa fundist um átök eða mannslát á meintum brotavettvangi og engin áþreifanleg sönnunargögn eru til staðar um að mönnunum hafi yfirhöfuð verið ráðinn bani. 

Aðalsönnunargögnin í málunum voru játningar sakborninganna, sem sakborningarnir reyndu að draga til baka, en dóminum þótti á sínum tíma ekki mark takandi á þeim afturköllunum.

Katrín Jakobsdóttir forsætisráðherra baðst afsökunar fyrir hönd ríkisstjórnar Íslands á því ranglæti sem sakborningarnir, aðstandendur þeirra og aðrir sem tengdust málunum máttu þola vegna Guðmundar- og Geirfinnsmálanna.

Erla Bolladóttir var ein þeirra sem var sakfelld í Hæstarétti 1980 sem fékk mál sitt ekki endurupptekið.

Klausturfokk

Það er ómögulegt að líta yfir árið 2018 án þess að ræða sexmenningana á Klaustur bar. Sama hvað fólki finnst um Báru Halldórsdóttur sem var þekkt í eina viku sem Marvin, eða meintar njósnaaðferðir hennar þegar hún tók upp samtöl sex þingmanna þann 20. nóvember var þar komin stærsta fréttavika ársins.

Tveir voru reknir úr þingflokki, tveir fóru í launalaust leyfi og sérfræðingar sniðganga velferðarnefnd. Meirihluti sitjandi þingmanna vill kollega sína burt eftir uppákomuna en þau virðast öll ætla að sitja sem fastast. 

Tal um kuntur, tíkur, eyjur og smjör á smokkum gekk fram af landsmönnum og á hundrað ára afmæli fullveldisins kom margmenni saman á Austurvelli og krafðist þess að þeir sem höfðu setið að sumbli og baktalað mann og annan þann 20. nóvember myndu segja af sér. Meðal mótmælenda var Bára Halldórsdóttir.

Á leiklestri á Klaustursupptökunum í Borgarleikhúsinu var kynjahlutverkum var snúið við og bæði forseti Alþingis og skrifstofustjóri Alþingis sendu frá sér fordæmalausar tilkynningar.

En Klaustursupptökurnar voru ekki einu upptökurnar sem komust í fréttir á árinu. Þar má einnig nefna upptöku af aðgerðum lögreglunnar gegn nöktum manni í Kópavogi, upptöku af umferðaróhappi eftir að bíll fór yfir á rauðu ljósi. Jú og myndband þar sem Atli Már Gylfason, sjálfstætt starfandi blaðamaður sést í vafasömum viðskiptum með stolið nautakjöt og tálbeituaðgerð sem endaði á borði lögreglu.

Afsagnir og uppsagnir

MeToo byltingin sem náði hámarki í lok árs 2017 teygði anga sína inn í árið 2018. Þannig stigu konur af erlendum uppruna fram í byrjun árs og vöktu sögur þeirra mikla athygli. Þá sérstaklega viðtal við Elínu Kristjánsdóttur sem er fædd og uppalin á Íslandi en hefur upplifað fordóma, áreitni og ofbeldi vegna kynþáttar og sagðist ekki hafa fundið sig í MeToo byltingunni þar til hópur kvenna af erlendum uppruna var stofnaður. 

Jakob Már Ásmundsson hætti í stjórn Arion Banka vegna óviðeigandi hegðunar á skemmtun á vegum bankans. Fjölmiðlamaðurinn Hjörtur Hjartarson hætti störfum hjá Sýn í kjölfar atviks á HM í knattspyrnu í Rússlandi og í yfirlýsingu sem hópur fjölmiðlakvenna sendi frá sér vegna málsins var skorað á yfirmenn Sýnar og annarra fjölmiðla að „fylgja eftir fögrum fyrirheitum #MeToo.“

Orri Páll Dýrason var sakaður um nauðgun af bandarísku listakonunni Megan Boyd og hætti hann sem trommari Sigur Rósar í kjölfarið. Bréf sem María Lilja þrastardóttir, eiginkona Orra Páls, skrifaði Meagan vakti mikla athygli lesenda. Þá var Bjarna Má Júlíussyni vikið úr starfi framkvæmdastjóra Orku náttúrunnar eftir óviðeigandi hegðun í garð starfsmanna. 

Björn Bragi Arnarsson hætti sem spyrill í Gettu Betur eftir að myndband af honum að káfa á unglingsstúlku fór í dreifingu á netinu og Ágúst Ólafur Ágústsson þingmaður Samfylkingarinnra fór í tveggja mánaða leyfi frá þingstörfum eftir að hafa áreitt blaðakonu Kjarnans kynferðislega í sumar.

Frá Sogni til Amsterdam

Sindri Þór Stefánsson varð frægasti fangi Íslands eftir að hann strauk frá fangelsinu að Sogni aðfararnótt 17. apríl. Sindri skellti sér til Keflavíkur og þaðan í flug til Svíþjóðar þar sem forsætisráðherra var einnig stödd. Sindri var að endingu handtekinn í miðborg Amsterdam þann 22. apríl. 

Sindri hafði setið í gæsluvarðhaldi frá 2. febrúar vegna rannsóknar lögreglu á umfangsmiklum þjófnaði á tölvubúnaði í Bitcoin málinu svokallaða. Á endanum voru sjö ákærðir í málinu fyrir innbrot í þrjú gagnaver. 

Þegar í dómsal var komið settu mótsagnir og minnisleysi svip sinn á framburð margra sakborninganna og fór saksóknari fram á fimm ára fangelsi yfir Sindra Þór.

Sem fyrr segir er þessi listi alls ekki tæmandi en fyrrnefndar fréttir eru á meðal helstu frétta ársins. Hér fyrir neðan í tengdum fréttum má sjá fleiri fréttir sem vöktu athygli.