Guðfræðingur upplifði námskeið Öldu Karenar sem trúarlega samkomu

LIFE Masterclass II námskeið Öldu Karenar Hjaltalín virkaði eins og trúarsamkoma á guð- og trúarbragðafræðinginn Bjarna Randver Sigurvinsson. Bjarni viðurkennir þó að ólíklega deili allir gestir námskeiðisins þeirri upplifun. Bjarni greindi frá upplifun sinni í Facebook færslu.

LIFE Masterclass II námskeiðið fór fram í Laugardalshöllinni í gær, fyrir námskeiðinu stóð athafnakonan Alda Karen Hjaltalín. Alda Karen hefur mikið verið í umræðunni undanfarna viku, fyrst vegna ummæla sinna um að kyssa eigi peninga og seinna vegna umdeildra ummæla henna, „Þú ert nóg“ í tengslum við sjálfsvíg.

Uppselt var á viðburðinn en ódýrustu miðar í Laugardalshöllina kostuðu 12.990kr. Allur ágóði af námskeiðinu rann til Pieta samtakanna, forvarnarsamtaka gegn sjálfsvígum og sjálfsskaða.

Hófst með fyrirlestri um jákvæða sjálfsmynd

Bjarni Randver Sigurvinsson, guð- og trúarbragðafræðingur, var einn þeirra sem lögðu leið sína í Laugardalshöllina til að hlýða á fyrirlesturinn. Bjarni sagði dagskrána hafa hafist með líflegum og afar einlægum fyrirlestri Öldu Karenar um mikilvægi jákvæðrar sjálfsmyndar.

Auk þess að sýna myndband frá bandarískum fyrirlesara tók Alda hjúkrunarfræðing og jóga gúru í viðtal.

Bjarni hefur pistilinn með því að lýsa því hve forvitnilegar samkomur sem þessar séu í hans huga. Bjarni greinir það sem fór fram sem „audience cult“ eða hóp einstaklingshyggjusinnaðra áheyrenda. Hugtakið sem hann notar, „Cult“, hafi því allt aðra merkingu hér en tíðkast til að mynda í umfjöllunum um sértrúarsöfnuði.

Í fyrsta viðtali Öldu Karenar var rope-jóga gúrúinn, Guðni Gunnarsson. Guðni fjallaði að sögn Bjarna um mikilvægi jákvæðrar sjálfsmyndar út frá eigin sjónarhóli. Alda tók einnig í viðtal hjúkrunarfræðinginn Sigríði A. Pálmarsdóttur sem beitir sjálfsdáleiðslu sem meðferðarúrræði.

Bjarni segir viðtölin hafa verið ágætlega áhugaverð og fyrirlestrana ósköp saklausa og þar hafi ekkert komið fram sem hægt væri að telja varhugavert. Bjarni segir viðburðinn hafa virkað á sig líkt og trúarsamkoma, áhersla á orkuna einkenndi framsetningu allra sem fram komu og vísaði Jóga-gúrúinn Guðni til almættisins. Bjarni telur þó ólíklegt að allir viðstaddir hafi haft sömu upplifun af viðburðinum.

Gagnrýnir lokaatriði kvöldsins

„Allt það fólk sem kom þarna fram virkaði á mig sem góðviljaðir einstaklingar sem vildu gera sér grein fyrir eigin takmörkunum og miðla áfram þeirri reynslu og þeim þroska sem þeir hefðu þegar náð að afla sér í von um að fleiri taki sjálfa sig í sátt og læri að elska sjálfa sig á heilbrigðan hátt.“ segir Bjarni í pistli sínum.

Hann segist jafn framt vera ágætlega sáttur með megnið af dagskránni en gagnrýnir hins vegar lokaatriði kvöldsins, hvar gestir voru kallaðir fram á gólf, raðað í raðir og var gert að láta í ljós hvort hinar ýmsu fullyrðingar áttu við um þá sjálfa.

Bjarni segir þær sumar hverjar hafa verið afar persónulegar og því alls ekki fyrir alla að ljóstra slíku upp um sig.

Bjarni talar um að Alda, sem hefur eins og áður segir verið gagnrýnd fyrir óvarlega framsetningu sína, hafi greinilega vandað sig á námskeiðinu. „Engum töfralausnum var heitið, engir læknar eða sálfræðingar voru gagnrýndir og engu var afneitað í vestrænum heilbrigðisvísindum,“ segir í færslunni.

Símar bannaðir og gestir bundnir trúnaði

Athygli vakti að í auglýsingum fyrir viðburðinn eru settar reglur um að símar hafi ekki verið leyfðir á meðan að á upplifuninni stóð sem og að áhorfendur skuldbindi sig til að gæta fyllsta trúnaðar um upplifunina sem fram fór á viðburðinum.

Bjarni sagði að lokum að ekkert væri í sjálfu sér athugavert við að rukkað hafi verið fyrir viðburðinn. Hægt hefði verið að fara dýpra í málin og námskeiðið hafi ekki verið akademískt. Bjarni segir Öldu að lokum hæfileikaríka og segist vona að hún gangi menntaveginn enn frekar.

Ekki náðist í Bjarna Randver við vinnslu fréttarinnar, pistil hans um LIFE Masterclass II má lesa hér að neðan.