Solskjær: Við ætlum að vinna eitthvað

Hinn magnaði bráðabirgðastjóri Man. Utd, Ole Gunnar Solskjær hefur engan áhuga á því að ná bara Meistaradeildarsæti. Hann vill vinna titil.

Man. Utd hefur unnið alla sex deildarleiki sína undir stjórn Solskjær og er komið á fullt í baráttuna um hið mikilvæga Meistaradeildarsæti. Solskjær vill meira en það.

„Við erum Man. Utd og eigum alltaf að stefna á að vinna deildina. Við munum ekki ná því í ár en verðum að reyna næsta tímabil,“ sagði Solskjær.

„Við erum í Meistaradeildinni og ensku bikarkeppninni. Við getum ekki bara sagt að við ætlum að ná Meistaradeildarsæti og búið. Við verðum að stefna á að vinna eitthvað og ég fer í alla leiki með það hugarfar að við getum unnið.“