22 milljónum ríkari en ekki látið neinn vita

Íslensk getspá greinir frá því að vinningshafi í fjórföldum Lottó potti um síðustu helgi hafi verið ungur maður af höfuðborgarsvæðinu. Hann hefði keypt miða á netinu og síðar um daginn hefði einhver tilfinning komið yfir hann svo hann keypti annan miða til öryggis. Sá miði hafi skilað honum fimm réttum og 22 skattfrjálsum milljónum.

Haft er eftir vinningshafanum að honum þætti þetta allt mjög ótrúlegt og þvílík heppni að hafa bætt aukamiða við. Tilfinningin hefði bara komið svo sterkt yfir hann að ekkert annað hafi verið í stöðunni en að kaupa miða.

Hann hafði enn ekki deilt gleði fréttunum með neinum og því lítið búinn að ákveða næstu skref.