Vítaskyttan sem aldrei klúðrar | Myndband

Max Kruse, leikmaður Werder Bremen og samherji Arons Jóhannssonar, skoraði í vítaspyrnukeppni Brimarborgara gegn Dortmund í þýska bikarnum í gærkvöldi en Bremen komst áfram á kostnað toppliðsins eftir æsispennandi 3-3 leik.

Það ætti ekki að koma neinum á óvart að Kruse skoraði úr sinni spyrnu því þetta var 24. spyrnan í röð sem þýski framaherjinn skorar úr. Hann er ekki búinn að klúðra vítaspyrnu í sex ár.

Þessi mikla markahrina úr vítum hófst 7. apríl 2012 en Þjóðverjinn þrítugi hefur síðan þá ekki klúðrað einu einasta víti. Í umsögn um myndband af öllum mörkunum á Youtube-síðu tölfræðiveitunnar InStat segir að Kruse gæti orðið fyrsti fótboltamaðurinn sem aldrei brennir af víti.

Kruse hefur skorað úr tólf vítaspyrnum í þýsku 1. deildinni og tólf í öðrum keppnum en hann er með eindæmum öruggur af punktinum eins og sjá má í myndbandinu hér að neðan.