Jón Arnór sekkur ekki í Síkinu: Þriðji 30 stiga leikurinn hans á Króknum

Jón Arnór Stefánsson hélt uppteknum hætti í Síkinu í gær þegar hann fór fyrir endurkomu sigri KR á Tindastól í Domino´s deild karla í körfubolta.

Jón Arnór skoraði 34 stig í leiknum sem þriðja hæsta stigaskor hjá íslenskum leikmanni í deildinni í vetur. Aðeins Brynjar Þór Björnsson hjá Tindastól og Elvar Már Friðriksson hjá Njarðvík hafa skorað meira í einum leik.

Þessi frammistaða Jóns í Síkinu í gær þarf kannski ekki að koma á óvart því þetta er þriðji 30 stiga leikur hans í deildinni og fimmti tuttugu stiga leikur hans í deildinni í þessu húsi.

Jón Arnór hefur spilað sex deildarleiki í húsinu og skorað í þeim 26,3 stig að meðaltali.

Jón Arnór Stefánsson hefur skorað 24 stig eða meira í fimm af sex leikjum sínum í íþróttahúsinu á Sauðárkróki. Jón Arnór hefur hitt úr 62,8 prósent þriggja stiga skotum sínum í þessum sex leikjum eða 27 af 43.

Það er aðeins 2017-18 tímabilið sem sker sig úr en þá var Jón Arnór lang frá sínu besta vegna meiðsla. Hann skoraði bara 10 stig í deildarleiknum á Króknum og svo „bara“ samanlagt 19 stig í tveimur leikjum í Síkinu í úrslitakeppninni.

Í tveimur bestu stigaleikjum Jóns Arnórs í Síkinu, 33 stiga leik í janúar 2017 og svo 34 stiga leiknum í gær þá hefur KR-liðið komið til baka úr slæmri stöðu. KR var mest 21 stigi undir í sigrinum í gær og mest 28 stigum undir í sigrinum fyrir tveimur árum. Þeir eru hins vegar aldrei úr leik með Jón Arnór Stefánsson innanborðs.

Hér fyrir neðan má sjá þessa mögnuðu framgöngu Jóns Arnórs á Sauðárkróki í deildarleikjum sínum þar á ferlinum.

Deildarleikir Jóns Arnórs Stefánssonar með KR-liðinu í Síkinu:

27 stig í 70-85 tapi 8. mars 2001

(hitti úr 4 af 8 þriggja stiga skotum)

24 stig í 75-72 sigri 3. mars 2002

(hitti úr 3 af 7 þriggja stiga skotum)

30 stig í 96-70 sigri 30. nóvember 2008

(hitti úr 5 af 5 þriggja stiga skotum)

33 stig í 94-87 sigri 6. janúar 2017

(hitti úr 6 af 7 þriggja stiga skotum)

10 stig í 80-105 tapi 2. mars 2018

(hitti úr 2 af 4 þriggja stiga skotum)

34 stig í 91-88 sigri 31. janúar 2019

(hitti úr 7 af 12 þriggja stiga skotum)

- Jón Arnór Stefánsson er á sínu sjöunda tímabili í úrvalsdeild karla en spilaði bara í úrslitakeppninni á því fyrsta vorið 2000.