Jakob góður í sigri Borås

Jakob Örn Sigurðarson átti flottan leik fyrir Borås Basket þegar liðið vann fimm stiga sigur á Wetterbygden Stars í sænsku úrvalsdeildinni í körfuknattleik í dag.

Borås var í 4.sæti deildarinnar fyrir leikinn í dag en Wetterbygden í 7.sætinu. Leikurinn var mikilvægur fyrir Borås í baráttunni í efri hluta deildarinnar og Jakob Örn steig heldur betur upp.

Hann skoraði 19 stig á aðeins 19 mínútum og hitti úr öllum sínum skotum í leiknum, hvort sem það var af vítalínunni, inni í teig eða fyrir utan teig. Hann skilaði flestum framlagsstigum hjá Borås og var lykilmaður í 84-79 sigri.