Þriggja og hálfs árs fangelsi fyrir innherjasvik hjá Icelandair

Mennirnir þrír sem ákærðir voru í Icelandair-innherjasvikamálinu voru allir sakfelldir í Héraðsdómi Reykjavíkur í dag. Tveir voru dæmdir til fangelsisvistar en sá þriðji hlaut skilorðsbundinn dóm, auk þess sem 52 milljónir króna voru gerðar upptækar.

Hinir ákærðu í málinu, þeir Kristján Georg Jósteinsson, Kjartan Jónsson og Kjartan Bergur Jónsson (framvegis Kjartan Bergur til aðgreiningar) höfðu allir haldið fram sakleysi sínu.

Mennirnir þrír voru ákærðir fyrir innherjasvik eða hlutdeild í slíku broti á árunum 2015 til 2017. Talið er að þeir hafi notfært sér upplýsingar frá Kjartani, sem hafði stöðu fruminnherja, í viðskiptum með hlutabréf í Icelandair og hagnast um rúmlega 61 milljón króna með gjörningnum.

Eini sakborningurinn sem mætti í dómsal í dag, Kjartan Jónsson, var dæmdur til 18 mánaða fangelsisvistar fyrir aðild sína að málinu. Auk þess gerði dómarinn kröfu um að næstum milljón króna yrði gerð upptæk, en fjárhæðin hafði verið á bankareikningi sem lagt var hald á við rannsókn málsins árið 2017. Þá var honum jafnframt gert að greiða tvo þriðju hluta verjendalauna sinna, en restin var greidd úr ríkissjóði.

Kristján Georg var að sama skapi dæmdur til fangelsisvistar, í 3 ár og 6 mánuði. Þá var auk þess gerð krafa um að félag hans sem einnig var ákært í málinu, Fastrek, sætti upptöku alls um 32 milljóna króna. Fjárhæðin er hluti af andvirði fasteignar að Dyngjuvegi 14 í Reykjavík, sem kyrrsett var í maí árið 2017. Hann skal jafnframt greiða þrjá fjórðu hluta verjendalauna sinna, en ríkissjóður stendur straum af fjórðungi kostnaðarins.

Þá hlaut Kjartan Bergur fjögurra mánaða skilorðsbundinn dóm. Hann þarf jafnframt að sæta upptöku á rúmlega 21 milljón króna, sem bæði er hluti af andvirði fasteignar á Vatnstíg, sem kyrrsett var í fyrra, sem og reiðufé. Honum var gert að greiða öll málsvarnarlaun sín.

Á tímabili brota samkvæmt ákæru gegndi Kjartan starfi forstöðumanns leiðakerfisstjórnunar Icelandair, sem er hluti af fyrirtækjasamstæðu móðurfelagsins Icelandair Group hf. Hann var skilgreindur í hópi lykilstarfsmanna og skráður fruminnherji í móðurfélaginu.

Kristján Georg er fyrrverandi eigandi félagsins Fastreks, sem hét áður VIP Travel, en viðskipti með hlutabréfin voru gerð í nafni félagsins. VIP Travel var eitt sinn tengt kampavínsklúbbnum VIP Club en greiðslur til klúbbsins fóru í gegnum félagið. Þá á Kristján að baki átján mánaða dóm fyrir rekstur pókerstaðar í Skeifunni en hann rekur í dag skemmtistaðinn Shooters við Austurstæti.

Fram kom í máli saksóknara við aðalmeðferð málsins, sem fram fór í janúar, að hann teldi við hæfi að Kjartan hlyti 2 til 2 og hálfs árs dóm, Kristján Georg hlyti 3 til 3 og hálfs árs dóm og Kjartan Bergur yrði dæmdur til 6 til 9 mánaða fangelsisvistar. Þar að auki skyldu fjármunir, alls að fjárhæð rúmlega 90 milljónir króna, gerðir upptækir.

Vísir fylgdist náið með aðalmeðferð málsins. Fréttir af aðalmeðferðinni má nálgast hér að neðan.