Kalt í dag en tvær lægðir væntanlegar eftir helgi

Í dag verður nokkuð hvöss vestanátt og bjartviðri á Austurlandi. Gert er ráð fyrir hægri sunnanátt sunnanlands með nokkuð þéttum éljabökkum er líður á morguninn. Einnig verður éljagangur á Vestfjörðum og á nyrstu annesjum, að því er fram kemur í hugleiðingum veðurfræðings á Veðurstofu Íslands. Frost 0 til 10 stig, kaldast í innsveitum en rétt ofan við frostmark yfir daginn víða við sjóinn í dag.

Á morgun verður nokkuð rólegt veður, kalt með éljum úti við sjóinn. Búast má við austan hvassviðri sunnantil síðdegis á laugardag með snjókomu eða slyddu sem gengur yfir landið á sunnudag.

Á mánudag er gert ráð fyrir allhvassri norðanátt og éljum norðanlands og verður kalt í veðri. Á þriðjudag er svo útlit fyrir lægð sunnan úr höfum með landsynningi, hlýnandi veðri og slyddu eða rigningu sunnan- og vestanlands. Önnur álíka lægð en heldur hlýrri er væntanleg í kjölfarið á miðvikudag.

Veðurhorfur á landinu næstu daga:

Á föstudag:

Vestlæg eða breytileg átt og 3-10 m/s og víða él úti við sjóinn. Frost 0 til 10 stig, kaldast í innsveitum. 

Á laugardag:

Hæg austlæg eða breytileg átt og talsvert frost um morguninn, en vaxandi austanátt og dregur úr frosti þegar kemur eftir hádegi, 13-20 síðdegis með snjókomu eða slyddu syðst og hiti um og yfir frostmarki, en hægari og þurrt fyrir norðan en austan 8-15 og dálítil snjókoma þar um kvöldið og frost 1 til 5 stig. 

Á sunnudag:

Austan- og norðaustanátt, hvassviðri norðvestantil en annars hægari. Talsverð slydda eða rigning A-lands, snjókoma N-lands, en rigning með köflum SV- og S-lands. Norðlægari um kvöldið og lægir S-lands og styttir upp, en áfram snjókoma N-til. Hiti 0 til 4 stig við S- og A-ströndina, en annars vægt frost. 

Á mánudag:

Útlit fyrir strekkings eða allhvassa norðanátt með snjókomu eða éljum um landið norðanvert en hægari og bjartviðri syðra. Frost 1 til 8 stig en um frostmark við SA-ströndina. 

Á þriðjudag:

Vaxandi suðaustan- og austanátt með slyddu og síðar rigningu sunnan- og vestanlands og hlýnandi veðri. 

Á miðvikudag:

Sunnan og suðaustanátt og rigning, einkum sunnan- og vestanlands og frostlaust um allt land.