Ramos öskraði á forsetann og sagðist vera til í að hætta

Það varð allt vitlaust í búningsklefa Real Madrid í vikunni eftir að liðið hafði fallið úr leik í Meistaradeildinni. Fyrirliði liðsins, Sergio Ramos, reifst þá heiftarlega við forseta félagsins, Florentino Perez.

Ramos var í leikbanni í leiknum en hann nældi sér viljandi í gult spjald í fyrri leiknum til þess að vera í banni í þeim síðari sem hann augljóslega taldi vera formsatriði. Fyrir þann fíflagang fékk hann aukaleik í bann.

Perez var reiður eftir niðurlæginguna gegn Ajax og strunsaði inn í klefa til þess að hella úr skálum reiði sinnar í garð leikmanna. Hann sagði þá hafa slæmt viðhorf og ekki vera til í að leggja sig fram. Forsetinn sagði þá hafa verið til skammar.

Þá fékk Ramos nóg og sakaði Perez og stjórnina um lélegt skipulag og sagði að það væri þeim að kenna hversu illa hefði gengið hjá liðinu í vetur. Báðum aðilum var mjög heitt í hamsi.

„Ég hef alltaf gefið þessu félagi allt sem ég á. Ég geri það fyrir félagið og meira að segja fyrir þig. Ef þú ert til í að borga upp samninginn minn þá skal ég fara,“ á reiður Ramos að hafa sagt við forsetann fyrir framan alla leikmenn liðsins.

Stjórn Real fundaði til tvö um nóttina eftir leikinn um næstu skref. Meðal annars um hvort félagið ætti að reka Santiago Solari þjálfara og ráða Jose Mourinho í staðinn. Ekki hefur enn verið tekin nein ákvörðun í þeim efnum.