Jóhann hættir með Grindavík

Jóhann Þór Ólafsson hættir sem þjálfari Grindavíkur í Domino's deild karla þegar tímabilinu líkur. Þetta tilkynnti félagið nú í kvöld.

Jóhann hefur þjálfað Grindavík síðustu fjögur ár og segir í tilkynningunni að hann hafi ákveðið að taka sér frí frá þjálfun. Hann kom Grindavík í úrslitaeinvígið í Domino's deildinni árið 2017 þar sem liðið tapaði fyrir KR.

„Um leið og við þökkum Jóhanni fyrir vel unnin störf í þágu klúbbsins viljum við árétta að það er stefna allra sem að liðinu koma að klára þetta tímabil með sæmd,“ sagði í tilkynningunni.

Grindavík er í harðri baráttu um sæti í úrslitakeppninni, er með 16 stig líkt og ÍR og Haukar í 7.- 9. sæti deildarinnar.