„Það er enginn að banna neinum eitt eða neitt“

„Nei, það verða engin viðurlög við því,“ segir Felix Bergsson, fararstjóri íslenska hópsins í Eurovision, hlæjandi aðspurður um hvort það muni hafa einhverjar afleiðingar fari Hatari úr fjölmiðlafríi sem tilkynnt var um í gær.

Athygli vakti að Hatari mætti ekki í Kastljós gærkvöldsins þrátt fyrir að hefð sé fyrir því að sigurvegari Söngvakeppninnar mæti í þáttinn eftir sigur. Undanfarin ár hafa fulltrúar Íslands verið gestir þáttarins, rætt þar sigurinn og spáð í spilin.

Þess í stað var Felix mættur og sagði hann meðlimi Hatara vera komna í fjölmiðlafrí eftir að ljóst varð að Hatari og lagið Hatrið mun sigra verði fulltrúi Íslands í Eurovision í ár.

Allir sáttir við fjölmiðlafríið segir Felix

Í samtali við Vísi segir Felix að ekki sé um fjölmiðlabann að ræða.

„Það er enginn að banna neinum eitt eða neitt. Þetta er bara ákvörðun sem við tökum saman með hljómsveitinni,“ segir Felix.

Hann segir meðlimi Hatara einnig vera sátta við ákvörðunina um fjölmiðlafríið.

„Þetta er ákvörðun sem að þeir eru mjög sáttir við og við ræddum þetta á fundi í gær. Þetta er ekkert síður að þeirra frumkvæði en okkar. Menn vilja fá bara smá tíma til að slappa af og taka stöðuna og æfa atriðið,“ segir Felix.

Framundan er töluverð vinna við undirbúning atriðisins en skila þarf nánari gögnum um það til Tel Aviv, þar sem keppnin verður haldin, í næstu viku. Það geri vinnuna flóknari að mati Felix að hljómsveitin sé fjölskipuð, með dansara og ýmislegt annað á sviðinu.

„Þetta er fjöllistahópur, þetta er ekki bara einn söngvari fremst á sviðinu. Við erum með sviðsmynd, við erum með eld, flókna myndútfærslu og svo náttúrulega alla framleiðsluna og myndvinnsluna sem er unnin af þessum hópi sem er bara gríðarlega spennandi,“ segir Felix.

Flytjendur sigurlagsins ekki sjálfkjörnir í lokakeppnina samvæmt reglum keppninnar

Sigur Hatara í Söngvakeppninni hefur vakið gríðarlega athygli víðs vegar, ekki síst í Ísrael, þar sem hljómsveitin hefur verið vöruð við því að vera með pólitískar yfirlýsingar.

Meðlimir Hatara hafa jú sagt að þeir hafi í hyggju að nota dagskrárvaldið sem fylgi keppnina til þess að gagnrýna stefnu Ísraels í garð Palestínumanna.

Í reglum Söngakeppninnar kemur þó nokkuð skýrt fram að textar, ræður eða látbragð/sviðshreyfingar af pólískum toga séu ekki leyfilegar, hvorki í Söngvakeppninni hér heima né í aðalkeppninni. Brot við reglunum geti varðað brottvísun úr keppninni.

„Nei, við höfum það ekki. Alls ekki,“ segir Felix aðspurður hvort að RÚV hafi áhyggjur af því að Hatari muni taka upp á einhverju sem geti varðað við reglur keppninnar og kostað brottrekstur úr keppninni.

Í reglum Söngvakeppninnar segir einnig að flytjendur sigurlagsins séu ekki sjálfkjörnir fulltrúar Íslands, né aðrir listamenn sem fram komu í atriðinu. Höfundur eða höfundar sigurlagsins skuldbindi sig hins vegar til þátttöku í Eurovision í Tel Aviv.

Eftir að úrslit liggja fyrir hefjist ferli þar sem RÚV velji, að höfðu samráði við höfund eða höfunda lagsins, það listafólk sem tekur þátt í Eurovision, að því er segir í reglunum. Þar segir einnig:

„Þeir sem verða fyrir valinu samþykkja að hlíta öllum reglum og skilmálum sem RÚV og EBU setja í tengslum viðkeppnina eða fyrirgera rétti sínum til þátttöku ella.“

Með þessum ákvæðum segir Felix að RÚV sé að tryggja sér að það hafi síðasta orðið.

„Þetta er formsatriði sem aldrei er fylgt eftir í raun en samt sem áður er nauðsynlegt að hafa í reglunum ef eitthvað slíkt kemur upp á. Ef einhver þarf að taka lokaákvörðun þá erum við sem gerum það hér,“ segir Felix.

Þá standi ekki til að setja Hatara einhverjar frekari reglur eða skilmála fyrir þátttöku en nú þegar séu í gildi.

„Nei, engin frekari skilyrði. Við vinnum bara mjög náið með þeim og það gengur mjög vel og við ætlum bara að halda því nána samstarfi áfram.“