Pep sagður halda því fram að enska úrvalsdeildin sé að hjálpa Liverpool á móti Man. City

Pep Guardiola, knattspyrnustjóri Manchester City, er sagður mjög reiður yfir leikjadagskrá Manchester City á lokasprettinum en liðið á enn möguleika á því að vinna fjórfalt á þessu tímabili.

Liverpool er með tveggja stiga forystu á Manchester City á toppnum í ensku úrvalsdeildinni en City-liðið á leik inni sem er reyndar á útivelli á móti nágrönnum þeirra í Manchester United.

Góður árangur Manchester City í enska bikarnum þýðir að það þarf að færa fleiri leiki hjá liðinu. Leikurinn á móti Manchester United var færður vegna leiksins við Swansea City í átta liða úrslitunum.

City átti að mæta Cardiff City 6. apríl næstkomandi en nú þarf að færa þann leik því þessa helgi fer fram undanúrslitaleikur Manchester City í enska bikarnum.

Leikurinn var þó ekki færður aftur eins og United leikurinn heldur fram um þrjá daga. Manchester City spilar því við Cardiff 3. apríl og mætir svo Brighton í undanúrslitum enska bikarsins aðeins 72 klukkutímum síðar.

Daily Mirror hefur heimildir fyrir því að Pep Guardiola sé brjálaður á bak við tjöldin vegna þessarar tilfærslu á Cardiff leiknum og telur að enska úrvalsdeildin sé að hjálpa Liverpool á móti Man. City

Það er ekki auðvelt að vera að keppa á þremur stöðum samtímis og það er ein af ástæðunum fyrir því hversu fá lið hafa náð að vinna þrennur eða þá fernuna.

How Liverpool and Man City's fixture lists compare - and Reds have big advantage https://t.co/exfLo4oulPpic.twitter.com/fqYpAZYyEz

— Mirror Football (@MirrorFootball) March 20, 2019

Aprílmánður verður hins vegar rosalegur fyrir City því þar bætast við leikir í átta liða úrslitum Meistaradeildarinnar líka.

Manchester City spilar því níu leiki á 30 dögum eða leik á rétt rúmlega þriggja daga fresti. Það er rosalega álag á lið þó að það búi yfir mikilli breidd eins og Manchester City.

„Þetta er geðveiki, allir leikirnir sem við eigum í april. Þess vegna þurfum við á öllum að halda,“ sagði Pep Guardiola meðal annars á blaðamannafundi. Hann kom þó ekki með neinar samsæriskenningar þar en þær fá greinilega að koma fram í dagsljósið á bak við tjöldin.