Eiga vart orð yfir mögnuðum árangri Fær­eyja: „Al­gjör­lega ein­stakt“

Færeyjar unnu sinn fyrsta sigur á stórmóti í handbolta í kvöld þegar að liðið valtaði yfir Svartfjallaland í D-riðli EM. Lokatölur 24-37 og von Færeyja um sæti í milliriðlum lifir.

Sigurinn er sá fyrsti í stórmótasögu Færeyja og jafnframt eru Færeyjar nú fámennasta þjóðin til þess að vinna leik á stórmóti í handbolta. Íbúafjöldinn í Færeyjum er í kringum 56 þúsund manns en fyrir sigur kvöldsins voru það Grænlendingar sem áttu metið, landslið Grænlands í handbolta vann leik á HM 2021 en þá var íbúafjöldi landsins um 57 þúsund manns.

„Þetta verður ekki betra en akkúrat svona,“ sagði Óli Mittún, lykilleikmaður færeyska landsliðsins í viðtali hjá Viaplay eftir sigurinn sögulega í dag en sérfræðingar streymisveitunnar áttu vart orð yfir árangri þessarar fámennu þjóðar.

„Það er engu líkara en að öll færeyska þjóðin sé hér í Noregi,“ sagði Daniel Höglund, sérfræðingur Viaplay og kollegi hans Kristian Kjelling, fyrrverandi landsliðsmaður Noregs, tók í svipaðan streng.

„Þetta er töfrum líkast,“ sagði hann og höfðu viðstaddir aldrei upplifað annað eins.

„Þetta er algjörlega einstakt,“ sagði Ole Erevik, fyrrverandi landsliðsmarkvörður Norðmanna og sérfræðingur Viaplay.