Skilorð fyrir brot gegn stúlku

Karlmaður sem særði blygðunarsemi ungrar stúlku árið 2017 var dæmdur í tveggja ára skilorðsbundið fangelsi í Héraðsdómi Reykjavíkur í gær. Maðurinn sendi stúlkunni ljósmynd af fólki í kynferðislegum athöfnum og klæmdist við hana í farsíma.

Lögmaður stúlkunnar krafðist miskabóta upp á eina milljón króna, en þar sem sérfræðigögn lágu ekki fyrir um afleiðingar brotsins var honum gert að greiða stúlkunni 200 þúsund krónur, ásamt hálfri milljón í þóknun lögmanna.

Maðurinn neitaði sök við þingfestingu málsins en játaði svo við þinghald í gær. Bað hann stúlkuna afsökunar á háttsemi sinni. Mat héraðsdómur það til refsiþyngingar að brotið hefði verið mjög gróft og maðurinn haft einbeittan brotavilja.