Landsmenn njóti veðurblíðunnar á meðan færi gefst

Búast má við sólríkum og hlýjum degi norðaustan- og austanlands í dag, þó heldur svalara verði þar en í gær. Þá víkur blíðviðrið undanfarna daga fyrir köldu lofti næstu daga. „Best er að njóta veðurblíðunnar því nú sér fyrir endann á hlýju sunnanáttunum sem hafa verið hjá okkur síðustu daga,“ segir í hugleiðingum veðurfræðings á vef Veðurstofu Íslands.

Sunnan- og vestantil á landinu er skúraloft allsráðandi sem nær hámarki seinnipartinn í dag en lægir síðan og styttir upp í kvöld og nótt.

Á morgun, á páskadag, verður fremur hæg austlæg átt á landinu og skýjað og þurrt að mestu, en heldur bjartara verður yfir norðausturlandi. Hiti verður 3 til 9 stig yfir daginn, hlýjast vestanlands. Vaxandi norðaustanátt þegar líður á morgundaginn og allhvass vindur með samfelldri rigningu austantil á landinu annað kvöld, en snjókomu til fjalla og kólnandi veðri.

Norðaustlæg átt á mánudag og fremur svalt í veðri. Dálítil él norðantil á landinu framan af degi, en lengst af úrkomulítið fyrir sunnan.

Veðurhorfur á landinu næstu daga

Á mánudag (annar í páskum):

Norðustlæg átt, 5-10 m/s og skýjað með köflum, en stöku él NA-lands. Austan 8-15 og fer að rigna S-lands um kvöldið. Hiti yfirleitt 2 til 7 stig að deginum. 

Á þriðjudag:

Austlæg átt, 8-15 m/s og slydda eða snjókoma N-til og hiti nálægt frostmarki, en rigning í öðrum landshlutum og hiti 2 til 7 stig. 

Á miðvikudag:

Suðlæg og síðar austlæg átt með rigningu og hlýnadi veður, en hvessir og bætir í úrkomu við S-lands um kvöldið. 

Á fimmtudag (sumardagurinn fyrsti) og föstudag:

Ákveðin austanátt og víða rigning, en úrkomulítið fyrir norðan. Hiti 7 til 14 stig, hlýjast V-lands.