Derby tryggði sig í umspilið

Derby County tryggði sér sæti í umspilinu um laust sæti í ensku úrvalsdeildinni með dramatískum sigri á West Bromwich Albion á lokadegi ensku Championship deildarinnar.

Línurnar voru nokkuð skýrar fyrir daginn. Norwich var svo gott sem búið að tryggja sér sigur í deildinni, Sheffield United var öruggt í öðru sæti og Leeds, West Brom og Aston Villa voru örugg með sæti í umspilinu.

Það var hins vegar mikil barátta á milli Derby, Middlesbrough og Bristol um síðasta umspilssætið.

Derby var í bestu stöðunni fyrir lokaumferðina en þegar seinni hálfleikur var nýfarinn af stað var útlitið ekki gott fyrir lærisveina Frank Lambard.

Stefan Johansen var nýbúinn að skora fyrir West Brom og jafna leikinn á sama tíma og Middlesbrough var 2-0 yfir gegn Rotherham. Sú staða þýddi að Derby var komið niður í sjöunda sæti og ekki í umspilssæti.

Þetta var þó enn í þeirra höndum, mark myndi breyta öllu. Það var Derby sem náði að koma þriðja markinu í leikinn, Mason Bennet kom þeim yfir á 70. mínútu af stuttu færi. Derby var aftur komið upp í sjötta sætið.

Þremur mínútum síðar skoraði Harry Wilson og fór langt með að tryggja Derby í umspilið. Derby sá leikinn út, vann 3-1 og tryggði sig inn í umspilið.

Norwich vann Aston Villa 2-1 á Villa Park og gulltryggði deildarmeistaratitilinn, Sheffield United gerði 2-2 jafntefli í Stoke.

Rotherham, Bolton og Ipswich féllu niður í C-deildina, Norwich og Sheffield United fara beint upp í úrvalsdeildina en Leeds, West Brom, Aston Villa og Derby spila umspil um eitt laust sæti. Leeds og Derby mætast í fyrri umferð umspilsins og West Brom og Aston Villa.

Birkir Bjarnason var á varamannabekknum hjá Aston Villa í dag, Patrik Sigurður Gunnarsson var á bekknum hjá Brentford og Jón Daði Böðvarsson var ekki í leikmannahóp Reading.

Úrslit lokaumferðarinnar:

Aston Villa - Norwich 1-2

Blackburn - Swansea 2-2

Brentford - Preston 3-0

Derby - West Brom 3-1

Hull - Bristol City 1-1

Ipswich - Leeds 3-2

Nottingham Forest - Bolton 1-0

Reading - Birmingham 0-0

Rotherham - Middlesbrough 1-2

Sheffield Wednesday - QPR 1-1

Stoke - Sheffield United 2-2

Wigan - Millwall 1-0