Landsliðsþjálfararnir drógu í Mjólkurbikarnum: Stórleikur fyrir norðan og Njarðvík heimsækir KR

Dregið var í átta liða úrslitin í Mjólkurbikar karla og kvenna í hádeginu en landsliðsþjálfararnir Erik Hamrén og Jón Þór Hauksson sáu um dráttinn.

Hjá konunum er stórleikurinn milli Þór/KA og Vals en liðin mætast á Akureyri. Inkasso-deildarliðin Tindastóll og Fylkir drógust ekki saman en Tindastóll heimsækir KR á meðan ÍA fær Fylki í heimsókn.

Átta liða úrslitin í kvennaflokki fara fram 28. og 29. júní en nýtt nafn verður skrifað á bikarinn í ár frá því í fyrra því Breiðablik er nú þegar úr leik.

Í karlaflokki fer eina Inkasso-deildarliðið sem var eftir í pottinum, Njarðvík, í vesturbæinn og heimsækir KR. Breiðablik, sem fór í úrslitaleikinn í fyrra, mætir Fylki.

Leikirnir hjá körlunum fara fram 26. og 27. júní.

Átta liða úrslit karla:

Breiðablik - Fylkir

ÍBV - Víkingur

KR - Njarðvík

FH - Grindavík

Átta liða úrslit kvenna:

ÍA - Fylkir

KR - Tindastóll

Selfoss - HK/Víkingur

Þór/KA - Valur