Atlético Madrid kaupir Morata

Atlético Madrid hefur gengið frá kaupunum á spænska framherjanum Álvaro Morata frá Chelsea. 

Morata var lánaður til Atlético um mitt síðasta tímabil og gilti lánssamningurinn til loka tímabilsins 2019-20. Atlético hefur nú keypt Morata sem skoraði sex mörk í 15 deildarleikjum fyrir liðið á síðasta tímabili.

Chelsea keypti Morata frá Real Madrid sumarið 2017 fyrir 60 milljónir punda. Hann skoraði 24 mörk í 72 leikjum fyrir Chelsea.

Morata var á mála hjá Atlético þegar hann var unglingur en hóf ferilinn með erkifjendunum í Real Madrid. Hann lék svo með Juventus í tvö ár en sneri aftur til Real Madrid 2016.

Morata, sem er 26 ára, vann spænsku úrvalsdeildina og Meistaradeild Evrópu í tvígang með Real Madrid. Þá varð hann tvöfaldur meistari á Ítalíu bæði árin sín hjá Juventus og bikarmeistari með Chelsea í fyrra.

Atlético endaði í 2. sæti spænsku úrvalsdeildarinnar á síðasta tímabili.