Allt sem tengist ljósmyndun

Saga Fotografica er ljósmyndasögusafn við Vetrar­braut á Siglufirði sem hjónin Baldvin Einarsson og Ingibjörg Sigurjónsdóttir stofnuðu árið 2012 og var opnað árið 2013. Á safninu eru til sýnis alls kyns tæki og tól sem tengjast ljósmyndun og ljósmyndavinnslu. Safnið stendur einnig fyrir ljósmyndasýningum.

„Við hjónin rekum verslun á Langholtsvegi í Reykjavík, BECO, og fengum mikið af gömlum ljósmyndavélum frá kúnnum sem vildu koma þeim í okkar vörslu, þannig að til varð mikið safn. Þegar við keyptum íbúð á Siglufirði og síðan gamalt hús vaknaði hugmyndin um að stofna ljósmyndasögusafn. Í þessu safni eru um 8.300 hlutir sem tengjast ljósmyndun, allt frá smástykkjum upp í stórar vélar,“ segir Baldvin.

Á neðri hæð safnsins má sjá ýmsa gamla muni sem tengjast ljósmyndagerð og vekja voldugar ljósmyndavélar einna mesta athygli. Þar er einnig ljósmyndasýning á myndum Vigfúsar Sigurgeirssonar frá Siglufirði, en sú sýning var opnuð um leið og safnið og hefur verið í gangi síðan. „Vigfús var mjög öflugur ljósmyndari í Reykjavík en kom fyrst hingað á Siglufjörð árið 1924 og myndaði síðan mannlífið í kringum síldina. Myndirnar á sýningunni eru frá árunum 1926-1954,“ segir Baldvin.

Á eftir hæð hússins eru haldnar ljósmyndasýningar. Þar má nú sjá ljósmyndir eftir Ragnar Axelsson frá Grænlandi, Íslandi og Færeyjum og myndir eftir Leif Þorsteinsson sem var ljósmyndari í Reykjavík og lést 2013. „Rétt áður en Leifur dó færði hann mér umslag með þessum myndum sem eru teknar í Reykjavík og þar á meðal er mynd af bragganum í Nauthólsvík. Leifur hafði afar gott auga fyrir ljósmyndum og þetta er svo flott gert hjá honum,“ segir Baldvin.

Hann segir aðsókn vera góða. „Siglfirðingar koma hingað og taka með sér gesti og aðsókn erlendra ferðamanna hefur aukist,“ segir hann.

Ekki er rukkað inn á safnið sem er opið alla daga í sumar frá eitt til fjögur.