Firmino lét flúra á sig myndir af báðum bikurunum sem hann vann | Mynd

Til að halda upp á góða uppskeru á síðasta tímabili fékk Roberto Firmino sér húðflúr með báðum bikurunum sem hann vann.

Á baki Firminos eru nú myndir af honum með Meistaradeildarbikarinn og af honum og fjölskyldu hans með Suður-Ameríkubikarinn.

Firmino vann Meistaradeild Evrópu með Liverpool í vor og fylgdi því svo eftir með því að vinna Suður-Ameríkukeppnina með Brasilíu í sumar.

Firmino skoraði 16 mörk í 48 leikjum með Liverpool á síðasta tímabili.

Hann skoraði svo tvö mörk í Suður-Ameríkukeppninni. Firmino hefur alls skorað tólf mörk í 38 landsleikjum fyrir Brasilíu.