Tekjur heild­sölu Nocco tæpir tveir milljarðar króna

Rekstrartekjur heildsölunnar Core ehf. sem flytur inn hinn vinsæla orkudrykk Nocco hafa aukist gríðarlega á síðustu árum.

Tekjur heildsölunnar í fyrra námu 1,8 milljörðum króna samanborið við 1,14 milljarða króna árið 2017 og árið 2016 voru tekjurnar 440 milljónir króna.

Að því er greint er frá á vef Viðskiptablaðsins jókst hagnaður heildsölunnar einnig töluvert í fyrra frá því sem var árið áður.

Árið 2018 hagnaðist Core þannig um tæpar 200 milljónir króna en árið 2017 um tæplega 150 milljónir króna. Sé farið aftur til ársins 2016 var hagnaðurinn svo enn minni eða sem nam 23 milljónum króna.

Heildsalan Core er í eigu hjónanna Ársæls Þórs Bjarnasonar og Kamillu Sveinsdóttur. Þau hafa rekið heildsöluna frá árinu 1998 og sérhæft sig í innflutningi á heilsuvörum.

Þannig flytja þau inn, auk Nocco, vörur sem notið hafa vaxandi vinsælda á síðustu árum, eins og til dæmis ávaxtadrykki frá Froosh, próteinstykki frá Barbells og snakk frá Popcorners.